01 Jch, Veltin, genant BeckerHensell*, Vnd Jch, Margrede, sin Eelich hußfrauwe, Erkennen vns offentlich Jnn diesem brieffe vor vns vnd alle vnser erben, Das wir||
02 recht vnd redelich verkaufft vnd zukauff geben haben off eyn widderkauff vnd verkeüffen auch Jnn krafft diszs brieffs Den Ersamen hern, dem pferrer||
03 vnd Capplane zu wachenheym an Jre Gemeyn presentz eyn Jerlich gult, Nemlich eyn halben gulden gelts vmb zehen gutter Rinischer gulden, kurfursten||
04 werunge, Der wir, Eelude, von den vorg[e]n[an]t[en] hern pferrer vnd Capplane wole gewert vnd bezalt sin vnd die Jn andern vnsern nütz, vnd schaden damit zuuorkome[n],||
05 gewandt haben. Den obgeschrieben halben gulden gelts Geredden vnd versprechen wir, eelute obgenant, vor vns vnd alle vnser erben den vorg[e]n[an]t[en] h[er]n pferrer||
06 vnd Capplane, Jre nachkomen oder Jrem presentzMeister* alle Jar Jerlich zureichen, zugeben vnd zuantworten ane Jren schaden off Sant Martins, des heiligen||
07 Bischoffs tag vngeuerlich. Vnd das soll nit hindern, verbieten, bekom[m]ern mit Gericht oder ane Gericht geistlich oder weltlich hern gewalt oder deheyne ander||
08 sach, die yemant erdencken kont oder mocht, ane alle geuerde. Vnd des zu merer sicherheit haben wir, eelude vorgenant, vor vns vnd vnser erben den vorgenanten||
09 hern pferrer vnd Capplan oder Jren nachkomen zu eym rechten, waren vnderpfande geleydt vnd legen auch Jnn crafft diszs brieffs: Jt[em] eyn morgen wyngarts,||
10 gelegen Jm hadlach, geforcht off eyn syte Wendell Strohecker oben zu, off die ander syte Reyse Peter, zinset vorhien eylff pfe[n]ninge; Jt[em] zwene morg[en] ackers||
11 off der heyden, geforcht BrünLorentz* oben zu, vnden zu Juncker Jacob Krauch seligen, zinsen vorhien iii s[chilling] d[enarii] vnd nitme, vnd sollent auch nitme zinsen, wyter||
12 verleyt oder verpfendt sin. Mit solichem vnderscheide: weres sach, das wir, obg[e]n[an]t[e] eelute, oder vnser erben vnd nachkomen eynichs Jars sumig wurden Vnd||
13 den obgeschrieben halben gulden gelts nit geben vnd vßrechten off das obgenant ziell Sant Martins tag oder Jnn viertzehen tagen darnach vngeuerlich,||
14 das doch nit sin soll, welichs iars das geschee, So sollent vnd mogent die vorg[e]n[an]ten hern pferrer, Capplane, Jre nachkomen oder eyn presentzMeister**||
15 von Jrentwegen off*** die vorgemelten wyngart vnd eckere wedten vnd die offholen nach Gerichts recht vnd gewonheit der Stat zu wachenhem. Vnnd||
16 weres sach, das solich wyngart, Ackere vnd vnderpfandt wie vorgemelt mit Gericht offgeholt vnd erwonnen wurde, Als vorgeschrieben steet, welichs||
17 Jars das also geschee, So soll eyn iglicher Schultheis, der dan zu zyten ist, die vorgenanten hern pferrer, Capplane, Jre nachkomen oder Jnhelter dißs brieffs||
18 Jnn die obgemelten vnderpfande seczen, schuren vnd schirmen als Jnn andere Jre eygen guttere. Auch sollen wir, eelüde dickgenant, oder vnser erben die||
19 vorg[e]n[an]t[en] vnderpfande Jnn rechtem redelichem vnd gewonlichem büwe vnd dünge, Jne dan zugehort, halten. Vnd weres sach, das sich hernachmals||
20 vber kurcz oder lang erfünde, das die obgemelten vnderpfande yemant mee zinßten, versaczt oder nit Jn buwe vnd dünge gehalten wurden, als vorgeschrieben steet,||
21 daran dan die obgemelten hern Jrer gulten vnd heuptgelts nit wole sicher weren, was sie des kostens oder schaden lyden oder haben wurden, solichs alles sollen||
22 wir, obg[e]n[an]t[e] eelute, oder vnser erben vnd nachkomen den obgemelten herren schuldig sin zukeren vnd naher[re] zutün nach erkenteniß des Rats oder ander erber||
23 lute ane Jnredde vnser, vnser erben vnd mengclichs von vnsern wegen. Vnd her[re]widder sollen wir, obg[e]n[an]t[e] eelute, oder vnser erben vns nit behelffen mit||
24 deheynen funden oder sachen, die den vorg[e]n[an]ten pferrer, Capplane oder Jren nachkomen an diesem kaüff Jnn eynichen weg geschaden vnd vns vnd vnsern erben||
25 gefro[m]men oder zu statten komen mochten, ane alle geüerde. Auch ist beredt, welichs iars wir, obg[e]n[an]t[e] eelude, oder vnser erben vnd nachkomen komen vierzehen tage||
26 vor Sant Jorgen tag, des Heiligen Ritters, vnd bringen zehen gutter Rynischer gulden an golde, kurfursten montz, die zu zyten genge vnd geneme sint, vnd begeren||
27 eyns widderkauffs, doch also, das alle gefallen gulten, kosten vnd schaden vorhien geracht vnd die vnderpfande mit Gericht, als vorgeschrieben steet, nit offgeholt||
28 sint, Die sollent die vorg[e]n[an]ten hern pferrer vnd Capplane, Jre nachkomen oder Jnhelter dißs brieffs von vns ne[m]men vnd vns diesen brieff wieder geben, der||
29 alsdan crafftloß vnd dott sin soll, Geuerde vnd argelist herJn gentzlich vßgescheiden. Vnd des zu warem orkunde vnd merer sicherheit, So haben wir,||
30 obg[e]n[an]ten eelute, mit fliß gebetten die Erbern, wisen Burgermeister vnd Rate zu wachenhem, das sie die vorgeschrieben vnderpfande vor sich ne[m]men vnd||
31 erkennen, ob der halb gulden gelts mitsampt dem heuptgelde damit Jn vorgeschriebener maß wole verlacht sy vnd Jre Jngesiegell wollen hencken||
32 an diesen brieff, vns vnd vnser erben vnd nachkomen zubesagen aller vorgeschrieben dinge. Des wir, die Burgermeister vnd Rate zu wachenheym||
33 yczgenant, vns bekennen, Das wir gewißt vnd erkant haben, das der obgemelt halb gulden gelts vnd heuptgelt mit dem vorgeschrieben wyngart vnd||
34 acker Jn vorgemelter maß mechtig vnd zu dieser zyt wole verlacht ist Vnd vnser Jngesiegell vmb flissiger bete willen der obgemelten eelude haben thüne||
35 hencken an diesen brieff, sie, Jre erben vnd nachkomen aller vorgeschrieben dinge zuubersagen. Der geben ist off dinstag nach Sant Medharts tag Jn dem||
36 Jare, Als man zalt nach Cristus geburt Dusent vierhundert Nüntzig vnd Nüne Jare.

Source Fulltext: Andreas Kuhn, M. A., Neustadt/Weinstraße. Patenschaft: Heimatverein Wachenheim