Vniuersi Sancte matris ecclesie filiis ad quos presentes littere peruenerint Iohannes miseracione diuina Lond[] episcopus salutem in domino Iesu Christo Paternarum traditionum exemplis debitum pastoralis officii persoluere cupientes monasteria ancillarum deo degentium sub nostro regimine que calcatis curis secularibus solius sponsi celestis cuius annulo subarrantur inherent desiderio tam competenti et regulari moderamine intendimus auctore deo disponere Vt ea que ad ipsarum sustentationem illis contulit pia fidelium deuotio sine perturbatione possidentes quanto minus desudant in exteriorum laborioso certamine cum Martha tanto liberius totis desideriis vacare possint interiori contemplationis dulcedini cum Maria Cum igitur felicis recordacionis Willelmus Lond[] episcopus predecessor noster honestam et laudabilem conuersationem in domino religiosarum mulierum priorisse et conuentus de Clerekenewelle pietatis oculo considerans ecclesiam de Nortwelde in proprios vsus eis contulerit et eedem moniales collationem huiusmodi postmodum a summis pontificibus ac episcopis predecessoribus nostris et a decano et capitulo London[] procurauerint confirmari salua competenti vicaria in eadem ecclesia ordinanda sicut in autenticis instrumentis vidimus plenius contineri nos in tam pio opere predecessorum nostrorum vestigiis inherentes concessionem et confirmationem predictis monialibus ipsis factas de predicta ecclesia quantum in nobis est concedimus et confirmamus meo tamen et ecclesie nostre Lond[] per omnia iure saluo Percipient autem predicte moniales et perpetuo iure possidebunt ratione apropriationis illam partem antiqui manerii ecclesie que vocatur Bernewyk[] cum grangiis aliis edificiis et gardinis prout distinguitur ab alia parte quodam muro terreo ducente a media porta vsque ad stratam que est retro curiam item duas croftas terre arrabiles propinquiores ecclesie prout fossatis et sepibus vallantur item duas partes totius prati et pasture pertinentium ad ecclesiam item duas partes decime garbarum cuiuscumque generis bladi ac etiam feni tocius parochie Et si terras aliquas de bruera vel bosco contigerit assartari in parochia predicta percipient moniales duas partes decime bladi inde peruenientis Similiter si terra aliqua nemus vel pratum seu alia possessio legata vel alio modo collata fuerit indistincte prefate ecclesie moniales predicte duas inde partes optinebunt super statu vicarie in ecclesia predicta taxande de voluntate et expresso consensu predictarum priorisse et conuentus taliter ordinamus videlicet quod nos et successores nostri episcopi Lond[] vicariam ipsam quotiens vacauerit ydonee persone conferemus iure nostro Et cum sedes Lond[] vaccauerit decanus et capitulum conferant eandem vicariam si ipsam tunc contingerit vacare Iam enim ipsam vicariam vacantem contulemus Ricardo de Eli presbitero qui ratione vicarie sue percipiet et perpetuo iure possidebit et successores sui vicarii similiter illam partem mansi ecclesie cum aula cameris aliis edificiis et gardinis propinquiorem cimiterio prout ab alia parte distinguntur muro terreo supradicto item illam terciam croftam que est remociora domibus suis predictis prout sepibus recluditur item terciam partem [prati] et pasture pertinentium ad ecclesiam item terciam partem decime garbarum cuiuscunque generis bladi et feni tocius parochie item terciam partem decime assertorum si que fieri contigerit item terciam partem terrarum nemorum pratorum vel aliarum possessionum si que contigerint indistincte legari vel alio modo conferri ecclesie predicte item omnes decimas minores oblationes obuentiones et alia omnia vndecunque perueniencia ratione ecclesie predicte Predictus vero vicarius et successores sui de portione sua soluent singulis annis monialibus predictis quatuor marcas sterlingorum ad quatuor terminos videlicet ad festum Sancti Michaelis natiuitatem domini pasche et natiuitatem Sancti Iohannis per equales porciones Si tamen vixerint vltra pascha si vero postquam fructus colligerint in autumpno quacumque hora decesserint ante pascha de tribus primis terminis solummodo satisfacere teneantur et futurus vicarius satisfaciet pro vltimo termino sequente Inuenient etiam vicarii suis sumptibus libros calices vestimenta et alia ornamenta ecclesie et sustentabunt vnam lampadem ardentem in ecclesia qui pro tribus croftis predictis solebat sustentari et per sufficientes et idoneos ministros facient eidem ecclesie deseruiri Alia vero omnia et ordinaria et extraordinaria predicte moniales et vicarii sustinebunt pro rata suarum porcionum Ordinamus etiam quod moniales a prestatione decimarum de terris pratis et pasturis illarum porcionum contingentibus sint immunes et vicarii similiter de contingentibus porcionem suam Et vt predictarum monialium indempnitati caueamus ne illarum laudanda simplicitas eis futuris temporibus sit dampnosa statuimus quod singuli quibus nos et successores nostri dictam vicariam conferemus antequam immittantur in ipsius collate sibi vicarie corporalem possessionem prestent monialibus predictis in capitulo suo apud Clerekenewelle iuramentum sicut fecit Ricardus suprascriptus quod predictas quatuor marcas annuas eis soluent terminis constitutis et quod nichil eorum que ad ipsas moniales pertinent per ordinationem predictam aliquatenus vsurpabunt Vt autem premissa omnia perpetue firmitatis robur optineant presentes litteras quadripartitas in modum cirographi confectas quarum vna pars penes nos alia penes moniales predictas tercia penes decanum et capitulum nostrum London[] et quarta penes vicarium et successores suos remanebunt fieri fecimus et nostri et predictarum priorisse et conuentus sigillorum impressionibus comuniri [hiis testibus Domino Herueo de Horham decano Lond[] Magistris Willelmo de Middelton offic[] cur[] Cantuar[] et Radulfo de Iuingho offic[] Lond[] Iohanne de Sancta Maria Radulfo de Baudak[] Roberto de Dreiton[] canonicis Lond[] Dominis Rogero de Westthorp[] et Iohanne de Waleton[] capellanis et aliis Dat[] apud Stebbenh[] non[] Iulij Anno gratie m cc septuagesimo quinto et pontificatus nostri anno secundo]

Source Fulltext: Cartulary of St. Mary Clerkenwell. W. O. Hassal. Camden Third Series, V.71. Offices of the Royal Historical Society. London. 1949.