Notum sit omnibus Christi fidelibus presens scriptum inspecturis uel audituris quod cum prior et conuentus de N iuxta Bed a priore et fratribus hospitalis Ierusalem in Anglia de domo eorundem de Peleng nomine ecclesie eorum de Wutton iure parochiali minutas decimas et etiam decimas feni petissent hospitalariis predictis se proponentibus super huiusmodi decimis priuilegio speciali domini pape munitos tandem inter eos amicabiliter anno gratie m cc xxxiij mense maii hoc modo conuenit uidelicet quod prior et conuentus de N predicti omnes decimas pretaxatas quas tunc temporis in parochia ecclesie predicte habuerunt hospitalarii predicti eis in pace perpetuo concedendas concesserunt et dimiserunt iidem autem hospitalarii predictis priori et conuentui pro bono pacis unam acram terre arabilis hac contemplatione in eadem parochia contulerunt que simul iacet in campo de Seltonehull inter terram canonicorum de Caldewelle ex parte orientali et terram Aspelonis de Selton ex parte occidentali et extenditur super Hochweya tenendam perpetuo et habendam libere et quiete nomine ecclesie eorum predicte Et ut hec compositio perpetue firmitatis robur optineat partes predicte eidem in modum cyrographi confecte sigilla sua apposuerunt uidelicet hospitalarii predicti signum suum parti remanenti cum canonicis predictis et canonici predicti signum suum parti remanenti penes hospitalarios predictos

Source Fulltext: Cartulary of Newnham Priory. Joyce Godber. Bedfordshire Historical Records Society, V.43. Bedfordshire Historical Records Society. Bedford. 1963-1964.