Cum contentio orta esset inter abbatem et conventum de Walden[a] ex parte una et priorem et fratres hospitalis Ierusalem in Anglia ex altera super decimis feni de pratis dictorum hospitalariorum in parochia ecclesie de Edelmeton[] quas abbas et conventus predicti ad ecclesiam eorum de Edelmeton[] predictam de iure communi pertinere asserebant hospitalariis predictis ex adverso asserentibus se speciali domini pape indulgencia a prestacione earumdem munitos Tandem eadem contencio anno domini millesimo ducentesimo tricesimo tercio mense maii in hunc modum amicabiliter conquievit videlicet quod dicti abbas et conventus hospitalariis predictis predictas decimas iuxta tenorem indulgencie domini pape perpetuo possidendas concesserunt Iidem autem hospitalarii ecclesie eorum predicte pro bono pacis ne forte eadem per retencionem huiusmodi decimarum enormiter ledi videretur tres solidos sterlingorum de domo eorum de Fonte Clericorum extra London[iam] annuatim concesserunt percipiendos infra octabas sancti Michaelis per manus preceptoris eiusdem domus Fontis Clericorum qui pro tempore extiterit hanc autem amicabilem composicionem partes adinvicem bona fide servare promiserunt Et ut eadem perpetue firmitatis robur optineat presenti scripto in modum cirographi confecto signa apposuerunt

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.