Noverint tam presentes quam futuri quod cum inter dominum s[avaricum] Bathon[iensem] et Glaston[iensem] episcopum et decanum et capitulum Wellen[] ex una parte et abbatem et conventum Beccen[] ex altera controversia diutius verteretur super ecclesia Sancti Andree de Cliva quam idem episcopus et decanus Wellen[sis] et capitulum eiusdem loci tanquam prebendam Wellen[sem] sibi vendicabant et abbas et conventus de Becco e contrario illam tanquam ius suum et ecclesie sue petebant et asserebant sub hac forma pacis tandem conquievit videlicet quod iam dictus episcopus de consensu Alexandri decani Wellen[sis] et totius capituli et de communi assensu abbatis et conventus Beccen[] concessit et ordinavit et scripto suo autentico confirmavit ut abbates et conventus de Becco imperpetuum teneant et habeant prenominatam ecclesiam de Cliva cum omnibus pertinenciis suis integre et quiete ab omni exaccione episcopali et archidiaconali et officialium suorum tanquam liberam prebandam Wellen[] et inde canonici sint tam abbates quam conventus Beccen[] habentes stallum in choro locum in capitulo communam et plenariam fraternitatem ecclesie Wellen[] in vita et in morte more aliorum canonicorum eo excepto quod dicti abbates et conventus de Becco nullatenus cogi poterunt ad residenciam faciendam in ecclesia Wellen[] in propria persona et quod contra hoc episcopi Bathon[] vel decani vel canonici Wellensis ecclesie nichil impetrabunt et si quid impetratum sit eo non utentur Abbas vero et conventus de Becco invenient vicarium perpetuo residentem in ecclesia Wellen[si] ministrantem pro eis in officio sacerdotali qui recipiet ab eis quatuor marcas sterlingorum in quatuor terminis anni scilicet in Natali unam marcam in Pascha unam marcam in festo beati Iohannis Baptiste unam marcam in festo sancti Michaelis unam marcam per procuratorem abbatum et conventus de Becco quem constituent super dicta ecclesia de Cliva recepturum eciam alia que vicarium contingunt ministrantem in officio sacerdotali in ecclesia Wellen[] secundum consuetudinem eiusdem ecclesie Preter hec episcopus et decanus Wellen[] et capitulum eiusdem loci concesserunt ut pro abbatibus Beccen[sibus] decedentibus fiat obsequium in ecclesia Wellen[si] in die obitus sui et die anniversarii sicut pro episcopis Bathon[] quantum ad spiritualia medio autem tempore tanquam pro canonico Wellensis ecclesie et pro fratribus decedentibus sicut pro canonicis ecclesie in obitu et die anniversarii et medio tempore sicut consuevit fieri pro canonicis Wellensibus in spiritualibus procuracione excepta Concesserunt eciam quod sive abbates sive alius quilibet monachus Beccen[sis] vel de ordine Becci per Welles transitum fecerit plenariam habeat communam tanquam canonicus Wellen[sis] sed et idem abbas et conventus de Becco id idem concesserunt si in ecclesia Beccen[] in vita et in morte pro episcopis Bathon[iensibus] et canonicis Wellen[sis] ecclesie Ut autem premissa per temporum successionem rata permaneant et inconcussa presentis scripti testimonio et sigillorum partis utriusque sunt roborata patrocinio Actum anno gracie mcxcix in presencia domini h[uberti] Cant[uariensis] archiepiscopi Radulfi primi abbatis de Cliva Godefridi fratris comitis Flandrensis archidiaconi Cameracensis Magistri I de Tinemue Magistri Willelmi de Sumercote Magistri Ade de Walsingeam Iohannis de Bunovilla Iohannis de Cruce capellani dicti archiepiscopi Iohannis de Sancto Edmundo

Source Fulltext: Select Documents of the English Lands of the Abbey of Bec. M. Chibnall. Camden Third Series, V.73. Offices of the Royal Historical Society. London. 1951.