Sciant presentes et futuri quod ego Ricardus Marscallus de Oxonia dedi concessi et hac presenti carta mea confirmaui Iohanni de Samforde molendinario et Alitie Ioye uxori sue domum meam que sita est inter terram que fuit aliquando Mathei le Boltere ex parte orientali et terram quam Philippus le Notur de me tenet ex parte occidentali in parochia beati Petri orientalis Oxonie que domus est extra portam orientalem Oxonie in suburbio eiusdem uille habend et tenend dictam domum cum pertinentiis de me et heredibus meis uel meis assignatis sibi et heredibus suis uel suis assignatis libere quiete bene pacifice iure et hereditario in perpetuum reddendo inde hospitali sancti Iohannis extra portam orientalem Oxonie annuatim et fratribus eiusdem loci octo solidos ad quatuor anni terminos uidelicet ad festum beati Thome apostoli duos solidos ad festum beate Marie in Martio duos solidos ad festum Natiuitatis beati Iohannis Baptiste duos solidos et ad festum sancti Michelis duos solidos et michi et heredibus meis uel meis assignatis sex solidos ad duos anni terminos uidelicet ad festum beate Marie in Martio tres solidos et ad festum sancti Michelis tres solidos pro omni seruitio seculari exactione et demanda Et ego predictus Ricardus et heredes mei uel mei assignati warantizabimus acquietabimus et defendemus dictam domum dictis Iohanni et Alitie et heredibus suis uel suis assignatis contra omnes gentes mares et feminas tam Iudeos quam Cristianos per predictum seruitium in perpetuum Pro hac autem donatione concessione warantizatione acquietatione defensione et presentis carte mee confirmatione dederunt michi predicti Iohannes et Alitia duas marcas sterlingorum in gersummam pre manibus et Matildi uxori mee duos solidos ad sotulares Et sciendum quod ego predictus Ricardus et heredes mei uel mei assignati et predicti fratres predicti hospitalis habebimus liberum introitum et exitum ad dictum tenementum distringendum pro predicto redditu nostro annuali quotienscumque aretro fuerit Dicti uero Iohannes et Alitia et heredes sui uel sui assignati non debent dictum tenementum in Iudaismo inuadiare neque alii loco religioso conferre quam predicto hospitali sine licentia custodis et fratrum predicti hospitalis Et ut omnia predicta firma et stabilia permaneant in perpetuum hanc cartam sigilli mei inpressione corroboraui hiis testibus Henrico Owein tunc maiore Oxonie Elya le Quilter Nicholao Aurifabro tunc balliuis Nicholao de Kingestune Iohanne Culuert Willelmo Pille Iohanne Filleking Iohanne Marscallo Philippo le Notur Matheo le Boltere Waltero Molendinario Iacobo Cantuariensi clerico et multis aliis

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.