Omnibus Christi fidelibus ad quos praesens scriptum pervenerit Willelmus divina miseratione Wygorniensis episcopus salutem gratiam et benedictionem Cum juxta continentiam litterarum apostolicarum ad nos per fratres hospitalis Sancti Bartholomaei inter pontes Gloverniae impetratarum super cantaria in dicto hospitali habenda licentiam celebrandi divina concedere non possimus in praejudicium juris alieni nos abbatem et conventum Sancti Petri Gloucestriae qui oratorium in dicto hospitali constructum infra limites parochiae suae contentum asseverant tandem induximus ad consentiendum divinae pietatis intuitu et pro suarum remedio animarum ut in dicto oratorio divina celebrentur salvis in omnibus et per omnia eorum libertatibus consuetudinibus et articulis in privilegiis suis contentis tam de sepultura mortuorum quam de omnibus aliis Singuli autem custodes qui pro tempore fuerint in dicto hospitali constituti in principio suae creationis ante quam ministrare incipiant Ita tamen quod interim non cesset cantaria jurabunt coram episcopo Wygorniensi qui pro tempore fuerit in proximo adventu ejus apud Gloverniam et in praesentia aliquorum monachorum Sancti Petri Gloverniae quod nec per se nec per alium procurabunt occasione licentiae celebrandi divina sibi concessae statum monasterii sui libertates jura consuetudines in aliquo laedi turbari vel diminui Si autem praefati custodes contrarium fecerint vel contra aliquem articulum in dictorum abbatis et conventus privilegiis contentum venire praesumpserint per se vel per alios et super hoc convicti fuerint canonice vel confessi coram episcopo loci vel ejus officiario vel alio per litteras suas patentes ad hoc deputato tam diu cesset cantaria in dicto hospitali donec praedictis abbati et conventui secundum quantitatem delicti plenius fuerit satisfactum Haec compositio facta fuit anno ab Incarnatione Domini millesimo ducentesimo tricesimo secundo In cujus rei testimonium etc

Source Fulltext: Historia et Cartularium Monasterii Sancti Petri Gloucestriae. William Henry Hart. Rerum Britannicarum Medii Aevi Scriptores, 33 P.1. Longman, Green. Longman, Roberts and Green. London. 1863.