Excellentissimo domino et patrono suo domino Henrico Dei gratia regi Angliae illustri domino Hiberniae etc sui semper devoti R decanus et capitulum Sarum salutem et in suscepto regni gubernaculo felicissimum incrementum Post petitam et obtentam a regia celsitudine licentiam eligendi episcopum et pastorem Sarum vocatis prout moris et juris est confratribus et concanonicis nostris die Sancti Vincentii invocata Spiritus Sancti gratia virum discretum Deo et ecclesiae devotum regiae majestati per Dei gratiam utilem et fidelem dominum W de la Wyla succentorem fratrem et concanonicum nostrum in Sarum episcopum et pastorem concorditer et uniformiter elegimus quem vestrae regiae serenitati per has nostras patentes litteras per dominos r[ob] thesaurarium n[ic de Capella] archidiaconum Sarum r[og de la Grene] archidiaconum Vyltsire et j[o de Burton] subdecanum Sarum confratres nostros ipsarum litterarum portitores praesentamus supplicantes devote ut huic nostrae electioni et electo regium velitis adhibere assensum tanto favorabilius et celerius si placet quod nostra Sarum ecclesia et dioecesis existit pastoris solatio non sine multiplici periculo viduata Datum apud Sarum die Conversionis beati Pauli anno praedicto Valeat serenitas vestra per tempora longiora

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.