Sciant presentes et futuri quod ego Cristina filia Gerini dedi concessi et hac presenti carta mea confirmavi in mea propria viduitate Avicie filie mee duas acras terre mee in cultura que vocatur Porterevemede cum pertinentiis suis in parochia de Alvithele de feodo domini Ricardi de Rupell[] scilicet illas duas acras terre que iacent in parte orientali de Porterevemede iuxta Withifeld[] et se extendunt in longitudine de Warawalla ex parte aquilonari videlicet ad culturam que vocatur Scheredey de feodo domini Stephani de Langton[] habendas et tenendas de me et heredibus meis dicte Avicie filie mee et heredibus suis vel cuicumque dare legare dimittere assignare voluerit exceptis Iudeis et viris religiosis libere quiete pacifice et integre in viis in semitis in aquis et pasturis in omnibus aysiamentis iamdicte terre pertinentibus absque ulla reclamacione vel iniusta vexacione mea vel heredum meorum reddendo inde annuatim michi vel heredibus meis dicta Avicia vel heredes sui quindecim denarios ad duos anni terminos scilicet ad Pascha septem denarios et obolum et ad festum sancti Michaelis septem denarios et obolum pro omni seculari servicio et exaccione vel demanda michi vel heredibus meis inde pertinente salvo servicio domini regis scilicet quantum pertinet ad duas acras terre de eodem feodo Pro hac autem donacione concessione et carte mee confirmacione dedit michi predicta Avicia quinque marcas argenti in gersumam in mea propria viduitate et ego dicta Cristina et heredes mei warantizabimus et defendemus dicte Avicie filie mee et heredibus suis vel suis assignatis iamdictam terram cum omnibus pertinentiis et libertatibus suis contra omnes gentes imperpetuum per predictum liberum servicium Et ut hec mea donacio et concessio et carte huius confirmacio rata et stabilis et inconcussa permaneat presens scriptum sigillo meo roboravi Hiis testibus Sawino de Wenintone Gervasio de Wenintone Radulpho de Cancia Thoma Bernard[] Willelmo monacho Ada filio Iohannis Baldewine Geroldo clerico Ada Iuvene Iohanne [filio] Baldewini Roberto de la Hell[] Henrico de Sch[e]newell[] Mansero de Horreo et multis aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.