Sciant presentes et futuri quod ego Thomas Doo dedi et concessi et hac presenti carta mea confirmavi Sawino filio Roberti de Wenint[on] et Iohanni filio Ricardi de Walda pro homagio et servicio suo quoddam stagnum super feodum meum ad quandam piscariam faciendam scilicet inter magnam gutteram aque et inter partes Iohannis filii Baldwini et Simonis filii Reginaldi habendum et tenendum iamdictis Sawino et Iohanni omnibus diebus vite sue per liberum servicium duorum denariorum michi et heredibus meis per annum solvendorum ad duos terminos scilicet ad Pascha unum denarium [et] ad festum sancti Michaelis unum denarium pro omnibus serviciis secularibus Et post decessum iamdictorum Sawini et Iohannis concessi et carta mea confirmavi ut heredes sui habeant et teneant prenominatum stagnum de me et de heredibus meis imperpetuum per liberum servicium quatuor denariorum michi et heredibus meis ad prefixos terminos solvendorum pro omnibus secularibus serviciis et demandis Ego vero memoratus Thomas et heredes mei prenominatum stagnum et piscarium prefatis Sawino et Iohanni et heredibus eorum sicut prenominatum est contra omnes gentes imperpetuum warantizabimus Et sciendum est quod ego nec heredes mei aliquam piscariam ad detrimentum prenominatorum Sawini et Iohannis et heredum suorum ponere poterimus Pro hac autem donacione et concessione et warantizacione et carte mee confirmacione dederunt prenominati Sawinus et Iohannes uxori mee sex denarios Hiis testibus Gilberto de Marisco Hugone le Bret Iohanne filio Baldewini Willelmo Godrinc[] Martino filio Thome Willelmo monaco Willelmo filio Fabiani et multis aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.