Sciant presentes et futuri quod ego Robertus Perepounde dedi concessi et hac presenti carta mea confirmavi Roberto de Northbourgh rectori ecclesie de Colnewake unum mesuagium centum et quatuor viginti acras terre quatuor acras prati decem et octo acras pasture viginti acras bosci et quinque solidatos redditus cum suis pertinentiis in villa de Mapeltrestede magna Mapeltrestede parva Gestyingthorpe et Belcham Otes habend et tenend omnia terras et predicta tenementa cum suis pertinentiis predicto Roberto de Northbourgh ad totam vitam suam de me heredibus et assignatis meis reddendo inde annuatim michi et heredibus seu assignatis meis per duodecim annos proximos sequentes post confectionem presencium unam rosam ad festum nativitatis sancti Iohannis Baptiste et post predictos duodecim annos plenarie completos reddendo inde michi et heredibus seu assignatis meis annuatim ad totam vitam suam duodecim marcas argenti ad duos anni terminos videlicet ad festa sancti Michaelis et Pasche per equales porciones solvendos Et si contingat predictum Robertum de Northbourgh infra terminum predictorum duodecim annorum proximorum sequencium post confectionem presencium in fata discedere volo et concedo per presentes quod executores sui habeant et teneant predicta tenementa cum suis pertinentiis usque ad finem predictorum duodecim annorum proximorum sequencium et plenarie completorum post datum presencium per servicium unius rose per annum solvende ad terminum predictum ut predictum est Et si predictus Robertus de Northbourgh per duodecim annos post datam presencium plenarie completos vixerit tunc post decessum ipsius Roberti de Northbourgh omnia terre et tenementa predicta cum suis pertinentiis michi dicto Roberto Perepounde et heredibus meis integre revertantur Et ego predictus Robertus Perepounde et heredes mei omnia terras et tenementa predicta cum suis pertinentiis predicto Roberto de Northbourgh ad totam vitam suam ut predictum est contra omnes gentes warantizabimus in cuius rei testimonium huic carte indentate sigilla nostra alternatim apposuimus Hiis testibus Iohanne de Lyston Thoma de Tornerth milite Iohanne de Loshey Ricardo de Odelesho Thoma atte Park Ricardo de Chelmesho et aliis Datum apud magnam Mapeltrestede die sabbati in septimana Pentechostes anno regni regis Edwardi tercii a conquestu quartodecimo

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.