Sciant presentes et futuri quod ego Gilbertus filius Rogeri de Helyun dedi et concessi et hac presenti carta mea confirmavi Ade capellano de magna Campes pro homagio et servicio suo dimidiam acram terre mee scilicet que iacet ad capud pomerii mei et extendit se versus crucem et iacet iuxta chemineum qui iacet ante portam meam et in aumento septem percatas terre et septem pedes in longitudine sitos inter capud predicte dimidie acre et mesuagium meum et habet se in latitudine tres percatas et tres pedes tam in gardino quam in terra lucrabili cum omnibus arboribus et foveis et exsitis et aliis pertinentiis et totam pasturam sicut in fossata est que iacet iuxta prefatum chemineum ad capud pontis subtus mesuagium meum cum omnibus foveis et pertinentiis suis tenendum et habendum de me et heredibus meis illi et heredibus suis vel quibuscumque illud tenementum dare vel assignare voluerit et eorum heredibus excepto domo religionis libere et quiete bene et in pace et hereditarie reddendo inde per annum michi et heredibus meis sex denarios scilicet ad Pascha tres denarios et ad festum sancti Michaelis tres denarios pro omnibus exaccionibus michi vel heredibus meis pertinentibus Pro hac autem donacione et huius carte mee confirmacione dedit michi prefatus Ada quatuordecim solidos et uxori mee duodecim denarios Et ego prefatus Gilbertus et heredes mei warantizare debemus predictum tenementum cum pertinentiis suis prenominato Ade et heredibus suis vel quibuscumque illud dare vel assignare voluerit et eorum heredibus excepto domo religionis contra omnes gentes Hiis testibus Andrea de Helyun Rogero filio Bernardi Ricardo Lutlae Laurencio de Camp[es] Waltero de Finchingefeld[] Willelmo Brun Willelmo pistore Roberto de Piro Rogero de Piro filio suo et multis aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.