Hec est finalis concordia facta in curia domini regis apud Chelmesford in crastino sancti Martini anno regni regis Henrici filii regis Iohannis quinquagesimo septimo coram magistro Rogero de Seyton Iohanne priore de Spaldyng Ada de Greynvile Henrico de Wulaminton Iohanne de Cobham et Thoma de Weylaund iusticiariis itinerantibus et aliis domini regis fidelibus tunc ibidem presentibus inter fratrem Rogerum de Veyr priorem hospitalis sancti Iohannis Ierusalem in Anglia querentem per fratrem Iohannem de Capenore positum loco suo ad lucrandum vel perdendum et Thomam filium Othonis deforciantem de consuetudinibus et serviciis que idem Thomas ab eo exigebat de libero tenemento suo quod de eo tenet in Oddewelle et Gestingthorpe Et unde idem Thomas exigebat a predicto priore quod redderet ei quinque solidos et decem denarios per annum et quod faceret sectam ad curiam ipsius Thome apud Gestingthorpe de tribus septimanis in tres septimanas que servicia et quas consuetudines idem prior ei prius non cognovit Et unde placitum fuit inter eos in eadem curia scilicet quod predictus Thomas recognovit predictum tenementum cum pertinentiis esse ius ipsius prioris et ecclesie sue sancti Iohannis Ierusalem habend et tenend eidem priori et successoribus suis et ecclesie sue predicte de predicto Thoma et heredibus suis in liberam puram et perpetuam elemosinam imperpetuum Et predictus Thomas et heredes sui warantizabunt acquietabunt et defendent eidem priori et successoribus suis et ecclesie sue predicte predictum tenementum cum pertinentiis ut puram et perpetuam elemosinam suam liberam et quietam ab omni seculari servicio inde faciendo imperpetuum Et pro hac recognicione warantizacione acquietacione defensione fine et concordia idem prior dedit predicto Thome triginta marcas argenti

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.