Inquisicio ex officio capta apud Walden die sabbati proxima ante festum sancti Georgio anno regni regis Henrici quarti post conquestum decimo coram Thoma Bendysshe escaetore domini regis in comitatu Essex per sacramentum Iohannis Cote etc qui dicit super sacramentum suum quod antecessores de Baytones in Hamstede in comitatu predicto quondam dederunt et concesserunt quoddam mesuagium vocatum le Freres cum pertinentiis in villis de Samford magna et parva priori hospitalis sancti Iohannis de Ierusalem in Anglia sibi et successoribus suis licencia regia inde non optenta sub condicione sequente videlicet ad inveniendum unum capellanum ydoneum divina servicia celebrantem in quadam capella scituata infra mesuagium predictum ter in qualibet septimana anni pro animabus dictorum antecessorum et pro omnibus benefactoribus suis et dicit quod predictus prior et predecessores sui dimiserunt dictam capellam ad terram cadere et quod cessaverunt de celebracione predicti presbiteri per spacium 20 annorum ultra elapsum et dicit quod mesuagium predictum cum pertinentiis valet per annum ultra reprisam 12 marcas

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.