R miseracione diuina Lincolniensis episcopus dilectis in Christo filiis dei gracia abbati de Egnesham et eiusdem loci conuentui salutem graciam et benediccionem Zelus religionis qui apud nos feruere dinoscitur et affectio peculiaris quam ad monasterium uestrum quod de nostro est patronatu semper habuimus et habemus nos inducunt ut illud oportunis muniamus fauoribus et prosequamur beniuolencia gracie specialis Cum igitur decimas quasdam infra limites parochiarum de Stoke Abbatis et de Cherleburia inpresenciarum percipiatis pacifice et eas sicut ueraciter intelleximus perceperitis ab antiquo ne super possessione et perceptione huiusmodi quorumcunque malignancium insultibus perturbemini ut ipsas in posterum libere sicut hactenus consueuistis percipere et in pios usus uestros conuertere ac per hoc ad excercenda misericordie opera quibus pro uiribus intenditis copiosius possitis sufficere uobis et monasterio uestro tenore presencium concedimus et possessionem seu percepcionem predictam quantum ad nos ut ad loci diocesanum pertinet acceptantes et ratificantes eas uobis et monasterio uestro auctoritate pontificali confirmamus Ualete Datum Lidinthon[] [ v Kalendas Aprilis anno domini mcc septuagesimo et Pontificatus nostri xii]

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.