Anno gracie mcc septuagesimo sexto facta est ordinacio ista inter Robertum de Fletham rectorem ecclesie beate Marie virginis Oxonie ex una parte et inter parochianos eiusdem ecclesie et executores Henrici de Lyncolnia defuncti de domibus quondam Henrici de Lyncolnia ad sustentacionem misse beate Marie in eadem ecclesia et de aliis singulis redditibus ad sustentacionem predicte misse et ad fabricam dicte ecclesie concessis et eciam ad sustentacionem luminarium in eadem ecclesia videlicet quod predicti parochiani ex consensu rectoris dicte ecclesie eligant duos fideles homines de predicta parochia ex parte una et unus fidelis ex parte rectoris dicte ecclesie eligatur qui curam habeant et custodiam dictarum domuum et reddituum dicte ecclesie singulorum diligenter colligendorum ita tamen quod compotum ex ipsis redditibus bis vel ter reddant quolibet anno pro voluntate rectoris dicte ecclesie et parochianorum discretorum Si vero aliquis electorum procuratorum inuentus fuerit minus utilis amoueatur ad arbitrium rectoris dicte ecclesie et parochianorum maturiorum Et si contingat quod aliquid fuerit residuum ultra sustentacionem misse seu fabrice dicte ecclesie vel luminarium ad alios usus competentes dicte ecclesie ordinetur per rectorem et parochianos Et ut ista ordinacio sit rata in perpetuum et stabilis et firma omnibus temporibus dicti rectoris et successorum eius in eadem ecclesia predictus Robertus de Fletham rector dicte ecclesie et parochiani eiusdem huic presenti scripto sigilla sua apposuerunt una cum sigillo predictorum executorum Et ad maiorem securitatem habend sigillum venerabilis patris domini Ricardi de Graueshende tunc temporis dei gracia episcopi Lyncolniensis et sigillum officialis Cantuarie tunc temporis scilicet magistri Willelmi de Middelthone et sigillum domini archidiaconi Oxon[] tunc temporis scilicet magistri Willelmi de la Gare huic scripto apponi procurauerunt

Source Fulltext: Oriel College Records. C. L. Shadwell and H. E. Salter. Oxford Historical Society, V.85. Oxford Historical Society. Clarendon Press. Oxford. 1926.