C. In nomine sanctae et indiuiduae trinitatis. Chuonradus diuina fauente clementia Romanorum imperator augustus. Si uenerabilia aecclesiarum dei loca alicuius doni incremento sublimare studemus, id profecto nobis nostrique regni statui liquido proficere minime diffidimus. Quapropter omnium Christi fidelium presentium scilicet ac futurorum nouerit uniuersitas, qualiter nos diuini amoris instinctu pro remedio animae nostrae ob interuentum et petitionem dilectae nostrae coniugis Gisilae imperatricis augustae, necnon Heinrici regis filii nostri, ob iuge etiam deuotumque seruitium fidelis nostri Egilberti Frisingensis aecclesiae¹ uenerabilis episcopi eidem presuli suaeque aecclesiae² Frisingensi largiti sumus in Orienti parte iuxta fluuium Urula uocatum in comitatu marchionis Adalberti³ cum omni lege hobas regales duas quae antea ad Murun sui iuris curtem ibi iuxta iacentem ex rebus regni pro beneficio concessae sunt, et insuper hobam unam regalem prope fluuium eundem inferius iacentem quam habuit in beneficium predictus marchio Adalpertus, et etiam in medio utrarumque partium iugera xxx supradictae curti contigua, quae Aribo de Ensinburc in beneficium habuit, cum omnibus eius apenditiis, areis, edificiis, exitibus et reditibus, uiis et inuiis, cultis et incolendis, quesitis (et) inquirendis, agris, campis, pratis, siluis, uenationibus, aquis aquarumque decursibus, molis, molendinis, piscationibus seu cum omnibus utilitatibus que˛ sic dici aut scribi possunt, easque per hanc nostram imperialem paginam de nostro iure et dominio in eius ius et dominium transfundimus et in proprium tradidimus ea videlicet ratione, ut iam dictus presul suique successores liberam deinceps potestatem habeant in usum aecclesiae⁴ quicquid eis placuerit faciendi. Insuper vero eidem episcopo confirmauimus ibi cetera sui iuris bona, a termino orientali ubi Liudzimannespah influit Ibisam et inde Phezniza⁵ deindeque Rudnicham, itemque a termino occidentali a uilla Chrellindorf usque in fluuium Zuchaha et ad Rudnicham sicque ad montana Carinthiam respicientia. Et ut hec nostre donationis immo confirmationis auctoritas stabilis et inconvulsa omni euuo permaneat, hoc preceptum inde conscriptum manu propria corroborantes sigillo nostro insignimus.||
Signum domni Chuonradi Romanorum (M.) imperatoris augustissimi.||
Purchardus cancellarius uice Bardonis archicapellani recognoui.||
Data nonis Maii anno dominicae incarnationis millesimo XXXIII, indictione II, anno autem domni Chonradi secundi regnantis X, imperii VIII. Actum Radaspone feliciter amen.

Source Fulltext: ZAHN, Codex Diplomaticus (=FRA II/31, Wien 1870) S. 75-76