Otto comes de Ebstein (!) sacri imperii per Austriam et Stiriam capitaneus et procurator vniuersis presentem litteram inspecturis salutem. Notum facimus singulis et vniuersis presentium per tenorem, quod nos (Ottonem de Perhtoltstorf), Ottonem de Haselowe, Ottonem de Missowe, dapiferum de Grizanstein et Witigonem scribam Austrie et Stirie fideiussores constituimus uenerabili domino Frisingensi episcopo pro dcc talentis Wiennensium denariorum pro expensis suis factis aput Wiennam, cuius pecunie medietas in festo Martini et altera medietas in Natiuitate domini eidem episcopo persoluetur, hoc tamen pacto interiecto, quod si dominus imperator ante prefixos terminos per suas patentes litteras supradicto episcopo directas prohibuerit recipere (predictum?) episcopum pecuniam prelibatam, ex tunc fideiussores predicti erunt absoluti, si autem dictus dominus i(mperator) medio tempore decesserit aut nos de medio reuocauerit uel si uiam carriis ingressi fuerimus uniuerse, aut (quod) si imperator dictam pecuniam nos soluere prohibuerit ante terminos statutos per suam presenciam personalem, dicti fideiussores esse debent similiter absoluti, item si de medio fuerit sublatus episcopus memoratus eadem (suo) decurrat [pecunia] successori. Adicimus eciam, si dicti fideiussores in solucione dicte pecunie statutis terminis fuerint negligentes, Wiennensem intrabunt ciuitatem, non exinde exituri donec prefata pecunia dicto domino episcopo persoluatur. In cuius rei testimonium presentem cedulam nostro sigillo iussimus communiri. Acta sunt hec aput Anasum anno domini M. CC. XLVII., V. indictione.

Source Fulltext: ZAHN, Codex Diplomaticus (=FRA II/31, Wien 1870) S. 147