Nos Ludwicus arcidiaconus Carniole et Marchie iudex a sede apostolicii delegatus in causa que inter venerabilem patrem et dominum . . . . electum Lauentensem ex vna et magistrum Heinricum canonicum sancti Andree Frisingensis, notarium venerabilis patris et domini C. Frisingensis episcopi vertebatur ex parte altera, super ecclesia sancti Petri Salzpurgensis diocesis sita iuxta provinciam siue districtum qui wlgo dicitur Longaewe, auditis et intellectis meritis ipsius cause, cum per certa et indubitata documenta luce clariora instrumentorum et testium omni exceptione maiorum coram nobis in iudicio lucide sit probatum, quod idem magister H. fuerit presentatus ad eandem ecclesiam sancti Petri venerabili domino et patri Salzburgensi archiepiscopo a venerabili domino C. episcopo Frisingensi et quod idem dominus episcopus Frisingensis verus sit patronus eiusdem ecclesie, quodque plures clerici ad presentationem episcoporum Frisingensium ipsam ecclesiam adepti longo tempore possederunt et quod dominus Vlricus quondam Lauentensis episcopus eandem ecclesiam tenuit temporibus vite sue ex paciencia eiusdem domini C. quondam Frisingensis episcopi ac recognouerit ipsum fuisse patronum uerum huiusmodi ecclesie et quod eadem ecclesia sancti Petri per se sit parrochialis ecclesia siue plebes (!) et quod alie due ecclesie dependeant ab ea tamquam filie a matre, discussisque et examinatis exacta diligentia singulis et uniuersis que ad instructionem talis negocii et pro iure eiusdem magistri H. facere poterant, eandem ecclesiam sancti Petri ipsi magistro H. canonico sancti Andree per diffinitiuam sententiam cum omnibus iuribus parrochialibus, decimis, dotibus et pertinenciis vniuersis in nornine patris et filii et spiritus sancti adiudicamus, imponendo eidem domino electo Lauentensi ac sue ecclesie super eadem ecclesia sancti Petri perpetuum silencium ipsumque ab ea quam qualitercunque tenuit occupatam, per eandem nostram diffinitiuam sentenciam penitus amouemus, insuper diffinitiue sententiando decernimus predictum magistrum H. fore instituendum canonice in prelibata ecclesia sancti Petri et eum in ea institutum auctoritate apostolica defendendum. Item condempnamus sepefatum dominum electum Lauentensem in xl marcis denariorum Frisacensium nomine fructuum perceptorum de prelibata ecclesia sancti Petri. Condempnamus eciam eundem dominum electum in v marcis Aquilegensium nomine expensarum quas idem magister H. in eadem lite probauit se veraciter expendisse.

Source Fulltext: ZAHN, Codex Diplomaticus (=FRA II/31, Wien 1870) S. 263-264