Anno domini millesimo ducentesimo LX. septimo, quinto idus Marcij, nobis Friderico abbate Gerstensi iudice delegato a venerabili patre et domino Petro Patauiensi episcopo in causa que inter venerabilem patrem et dominum patrem et dominum Chunradum Frisingensem episcopum et magistrum Ulricum Patauiensis ecclesie canonicum prothonotarium serenissimi regis Boemie ex una et dominam Ofmiam ac ipsius heredes de Potendorf et Fridericum clericum dictum de Potendorf super fundo et jure patronatus ecclesie in Herrantstein vertebatur ex parte altera, presidentibus iudicio in Amsteten in ecclesia parrochiali comparuit coram nobis magister Chunradus canonicus sancti Andree Frisingensis procurator dictorum domini Ch. Frisingensis episcopi et magistri Vlrici, petens ut cum dicta domina O. et eius heredes sepius citati comparere in iudicio contumaciter negligerent et nunc ad obiciendum in personas et dicta testium et audiendum sentenciam ad instantem terminum non iuris necessitate, sed ex super habundanti et de benignitate iudicantis sint citati, vt non obstante eorum contumaci absencia in causa nobis commissa procedere deberemus. Nos itaque adhibito consilio prudentum ad ipsum censuimus faciendum. Post hec dictus procurator, cum esset salua tercia productio testium dominum Rudolfum vicedominum domini nostri Patauiensis episcopi et Ottonem de Lv^esnek et dominum Dietricum de Richerstorf milites testes induxit interrogantes super articolis in priori termino apud Agmv^end expressis in iudicio coram nobis, quibus inquam testibus auditis et examinatis dictisque eorum in scriptis redactis petiuit dictus magister Ch. procurator, vt tam dicta et attestaciones testium predictorum quam et testium productorum in primo termino aput Agmund et eorum ad quos propter distanciam nimiam locorum Chunradum notarium nostrum iuratum vice tabellionis audiendos misimus, publicari in iudicio faceremus. Testes autem ad quos predictum notarium nostrum misimus, sunt hii magister Heinricus canonicus Ardacensis; Perhtoldus vicarius in Herrantstain, Heinricus de Gutenturn, Wolfkerus frater vicarii iam predicti. Publicatis igitur attestacionibus omnium predictorum dictis et circumstanciis dictorum et personarum exquisitis et diligencius examinatis inuenimus omnes articulos probatos veraciter per dicta omnium testium predictorum, ad quos inquam articulos pars domini C. episcopi Frisingensis et magistri Vlrici in primo termino aput Agmund se nobis astrinxerat probaturam, illo articulo excepto quod domine Alhedis soror domini C. comitis de Newenburch mater domine O. de Potendorf renunciauit omni hereditati quam adeptura fuisset de bonis paternis siue maternis, cum nupserit inferiori videlicet ministeriali, qui tamen articulus, videlicet quod dicta domina Alhedis mater domine O. de Potendorf renunciauit hereditati vt iam premissum est, per tres testes videlicet dominum Perhtoldum vicarium ecclesie in Herrantstain et dominum Ottonem de Lusneke et Heinricum de Gutenturn est coram nobis dilucide comprobatum. Deinde magister Ch. procurator, cum omnia que ad dicti domini episcopi et magistri Vlrici fundandam intencionem facerent, fuerint liquido conprobata, sentenciam diffinitiuam tieri a nobis cum instancia postulauit. Nos itaque partem aduersam habito consilio duximus usque ad uesperam expectandam, circa uesperam autem diei premissi redeuntibus nobis in dictam ecclesiam Amsteten, assidentibus nobis uiris discretis sentenciam diffinitiuam parte aduersa plus debito expectata, protulimus in hec uerba: In nomine domini amen. Anno domini M. CC. LXVII.¹, quinto idus Marcii. Nos Fridericus abbas Gerstensis monasterii. iudex delegatus venerabilis patris et domini nostri P. Patauiensis episcopi, intellectis cause meritis super fundo et iure proprietatis ecclesie in Herrantstein nobis commisse, visis et intellectis instrumentis autenticis probatisque omnibus tam per instrumenta quam testes legittimos que ad fundandam intencionem venerabilis patris et domini Frisingensis episcopi et magistri Vl. canonici Patauiensis de iure facere poterant, diffinitiue pronunciamus, fundum et ius patronatus ecclesie in Herrantstain legittimo titulo deuoluta et translata in dominium ecclesie Frisingensis et dictum dominum Frisingensem existere verum dominum fundi patronum ecclesie in Herrantstain, per sentenciam etiam nostram restituimus patrem et dominum C. Frisingensem episcopum et ipsam ecclesiam Frisingensem ad possessionem fundi et iuris patronatus ecclesie in Herrantstain reducentes ipsum dominum episcopum et ecclesiam Frisingensem ad omne ius in quo erant ante tempus electionis per dominam O. de Potendorf et eius heredes facte, quoad fundum et ius patronatus ecclesie memorate. Item diffinitiue sentenciando remouemus Fridericum clericum tanquam illicitum detentorem, imponendo sibi perpetuum silencium super ecclesia eadem, habendo in suspenso de condempnacione expensarum. Per sentenciam quoque nostram diffinitiuam decernimus magistrum Vl. canonicum Patauiensis ecclesie presentatum ad dictam ecclesiam Herrantstain a prelibato domino C. episcopo Frisingensi, instituendum canonice in eadem et mittendum in ipsius possessionem corporalem et inductum regulariter defendendum, decernentes per eandem sentenciam nostram diffinitiuam fructus et prouentus ipsius ecclesie Herrantstain collectos a tempore presentacionis sue assignandos ipsi magistro VI. tanquam vero plebano ecclesie Herrantstain. Per sentenciam etiam nostram diffinitiuam imponimus domine O. de Potendorf et suis heredibus perpetuum silencium super fundo et iure patronatus ecclesie H., cum plene nobis per legittima documenta constiterit, quod domina Alhedis mater dicte domine O. de Potendorf expresse renunciauerit omni iuri quod habere videbatur in fundo et iure patronatus ecclesie in Herrantstain, adiudicantes.ipsi domino episcopo et ecclesie Frisingensi fundum et ius patronatus ecclesie supradicte, habendo in suspenso condempnacionem expensarum. Prolata est hec sentencia in scriptis anno, die et loco supradictis.

Source Fulltext: ZAHN, Codex Diplomaticus (=FRA II/31, Wien 1870) S. 284-287