Acta iudiciorum et alia quelibet negocia que tractantur in tempore, ne labantur cum tempore, lingua debent testium et litterarum testimonio perennari propter memoriam hominum que labilis est et caduca. Nos igitur Emcho dei gracia ecclesie Frisingensis episcopus ad audienciam presencium et ad noticiam deducimus futuorum, quod materia questionis que inter nos ex parte vna et inter nobilem dominam Alhaidim de Reinsperch ex altera vertebatur super quodam predio in Haberuelt et super restitucione hincinde ablatorum, est taliter terminata, videlicet quod nos et eadem domina de Reinsperch de pari et vnanimi voluntate in nobilem virum dominum Fridericum de Hausek tanquam in arbitrum siue amicabilem compositorem compromisimus, promittentes ratum et firmum tenere quicquid super premissis idem Hausekkarius duxerit statuendum, qui communicato prudentum consilio de nostra et dicte domine Alhaidis bona voluntate proximam feriam terciam ante festum beati Andree apostoli pro termino peremptorio apud Waidhoven habendo statuit et prefixit in omnem euentum. Arbitratus est etiam idem Hausekarius quod medio tempore deberent ablata restitui hinc et inde. Adueniente vero huiusmodi termino peremptorio multisque nobilibus, Frisingensis ecclesie ministerialibus et vasallis in simul aput Waidhouen congregatis personaliter comparuimus, expectantes per totam eandem feriam terciam vsque post crepusculum noctis aduentum domine memorate que tandem sub noctis caligine coram nobis et dictis nobilibus comparuit, allegans quod esset parata testes producere ad probandum quod ex collacione et infeudacione pie memorie domini Friderici olim episcopi Frisingensis nostri predecessoris deberet dictum predium in Haberuelt tanquam feudum personale pro vite sue temporibus possidere. Nos vero in contrarium allegantes diximus, quod ad hoc nobis et ipsi domine terminus peremptorius fuisset deputatus quod post litis contestacionem primitus in iudicio factam deberent cum aliis clausulis que in vero et integro iudicio requiruntur, probaciones recipi et testes, et hanc nostram excepcionem factam in subsequentis diei circa horam terciam probauimus per testes ydoneos necnon fidedignos, videlicet per dilectos fideles nostros Ekhardum de Vihdorf et Albertum Protarium milites qui iurati et interrogati dixerunt sub religione prestiti sacramenti, quod vidissent et audiuissent atque personaliter interfuissent vbi prefatus dominus Hausekkarius aput Waidhouen inter nos et predictam dominam de Reinsperch statuisset terminum in omnem euentum peremptorium super litis contestacione facienda et super aliis vniuersis clausulis que in vero et integro iudicio vsque ad finem debitum consueuerunt a iudicibus exerceri, post quorum inquam dicta testium nobis competeret ad faciendum qui omnes concorditer in vnam sentenciam concordauerunt, dicentes sentencialiter et pronunciantes sub sacramento, quod ex eorundem productorum testium legalium dictis racionabilibus et probabilibus nobis et ecclesie Frisingensi possessio et proprietas esset adiudicata in predio supradicto et quod prelibate domine de Reinsperch nichil iuris decetero competeret in eadem et quod prefatus dominus de Hauseke tamquam verus fideiussor deberet nostrum colonum in eodem predio residentem in omnibus et per omnia indempnem reddere quantum ad integralem restitucionem ablatorum et super aliis dampnis et violenciis de mandato eiusdem domine sepedicto colono nostro contra debitum iusticie irrogatis. Insuper coram omnibus supradictis Frisingensis ecclesie ministerialibus et vasallis et in eodem termino probauimus per legittimum testimonium, quod licet apud Waidhouen in aula nostra prelibatam dominam de Reinsperch de omnibus feodis personalibus secundum predecessorum nostrorum litterarum continenciam pro temporibus vite sue inuestiti fuissemus, tamen sub publica protestacione memoratum predium in Habervelt et colonum in eodem predio residentem cum silvis, pratis, pascuis et viarum exitibus et aliis vniuersis eidem predio attinentibus excepimus et exclusimus viua voce, allegantes pariter et dicentes quod predecessor noster pie memorie dominus Fridericus olim episcopus Frisingensis sine consensu capituli sui dictum predium in Haberuelt ab antiquo ad episcopalem mensam pertinens nec eidem eidem domine, nec alicui alteri homini poterat ab ecclesia Frisingensi aliquatenus alienare, nisi pro temporibus vite sue et non illius qui huiusmodi fevdum personale reciperet ab eodem. Verum cum hec omnia que supradiximus, a nobis allegantibus iura nostra et protestantibus audiuisset et vidisset domina memorata, quod secundum eius sinistre intencionis propositum non posset testes producere sine contestacione litis et iudicii ordinarii, ordine non seruato statim sub prelibate noctis calligine in qua venerat, transacto iam prefixo ei termino, tamquam desperata de iure eius quod se habere in memorato predio credidit, se per contumaciam absentauit, cuius absenciam non approbantes contumacem in eodem termino de speciali gracia vsque in crastinum prorogato, circa subsequentis eiusdem diei horam terciam nostram intencionem quemadmodum supra expressimus, obtinuimus iusticia mediante. Ne igitur huiusmodi acta iudiciorum que racionabiliter sunt congesta, possent in dubium uel in irritum reuocari, presentem paginam in iudicio conscriptam tam nostro quam karissimi fratris nostri comitis (Hugonis) canonici Maguntini et dilecti in Christo fratris magistri Hainrici venerabilis prepositi Werdensis sigillis pendentibus iussimus communiri. Acta sunt hec apud Waydhouen in aula nostra, anno domini M. CC. LXXX. tercio, VIII. kalendas Decembris, testibus presentibus subnotatis, videlicet fratre nostro comite Hvgone canonico Maguntino, magistro Hainrico preposito Werdensi, Arnoldo capellano plebano de Vergin, Ottone plebano de Nevnhoven, Gotfrido notario nostro, item Purchardo de Wasen et Hainrico eiusdem filio, Ekhardo de Viehdorf, Alberone Protario, Ottone de Mezzeleinsdorf et Ottone filio suo de Sumereke militibus, item Friderico Hallone, Vlrico Smazone, Nycolao de Lok, Ottone et Alberto fratribus de Viehdorf, Friderico Schafferveldario, Nycolao Aychario, Vlrico Puchario, Ditrico chastenario, Jevbardo de Vdmaruelt, item Levpoldo Verl, Weichardo Haesip vasallis et ministerialibus ecclesie Frisingensis, item Chvnrado notario, Wielando iudice, Rudlino, Mozzone, Alberone fratribus, item Ortolfo et Wolfero Phlusthardis fratribus ciuibus nostris in Waydhouen et aliis pluribus fide dignis.

Source Fulltext: ZAHN, Codex Diplomaticus (=FRA II/31, Wien 1870) S. 401-404