Ich Alhaeit von Reinsperch witeb hern Engelschalches von Reinsperch tun allen den chunt di disen brief an sechent, daz ich den chriech den ich mit minem herren dem bihschof Chvnrat von Frisingen vber daz haus ze Randekke het vnd vber daz vrbor, zehent vnd manschaft, als es zv dem vrbor ze Randekke gehoeret vnd gehoern schol, vnd auch vber ander manschaft div in mines herren des bihschofs lvezze leit ze Vdmaruelt vnd anderswa, gesuht vnd vngesuht daz ich vor hete, nach mines wirtes tot also verslihtet han vnd zerfuret han nach sinen genaden, daz ich dar gie vnd in sin hant gap allen den chriech vnd alles daz reht des ich auf das gut daz da hie vor genant ist, iach oder geiechen mohte vnd dar von gestunt vnverschaidenlichen, vnd daz er mir die genade tete nach sines rates wisunge, daz er mir daz vrbor vnd di purch, zehent vnd manschaft ze Randekke geliehen hat ze einem leipgedinge ze min aeines leib vnd niht furbaz, also div Sliffach genhalb get vnd niht furbaz, also ob ich aeinen wirt nem oder chint gewinne, daz div nihtesniht rehtes nach minem tode auf daz gut daz da vor genant ist, schullen iehen, wan daz ez sazehant an daz goteshaus ze Frisingen freilich an chriech schol gevallen. Darzv han ich minem herren dem bihschof gehaizzen bi minen triwen als ich swern schol, daz ich des vrbors, noch des zehent, noch der manschaft ze Randekke als si dar (zv) gehoeret, nihtesniht an werden schol, weder mit verchauffen, noch mit versezzen, noch mit deheinen dingen andern, vnd ob ich daz tet wider min gelubden, daz schol dehein staet habm (!) vnd dar zv schol ich von dem rehte daz ich an dem leipgedinge gih, ganzlich sin gevallen. Swaz aber der andern manschaft ist di her Engelschalch min wirt von dem goteshaus ze Frisingen het dishalp der Sliffach ze Vdmaruelt vnd anderswa auf des goteshaus aigen von Frisingen, da pin ich gar von gestanden vnd han mich sin verzigen also, daz div selb manschaft min herre der bihschof habm schol an chriech ewichlichen vnd sin nach chomen. Dar zv nach miner bet vnd nach minen gehaizzen hat Wulvinch der auf dem haus ze Randekke sizzet, minem herren dem bihschof gehaeizzen bi sinen triwen als er sweren schol fur sich vnd fur siniv chint, ob er oder sin chinde deheinez mich vber leben, daz div dem lehen der pverge ze Randekke vnd des lehens des si hampt(!) daz zv der puerge gehoeret, nindert nach volgen wan datzze minem herren dem bihschof oder datze sinem nach chomen. Dar vber vergih ich Alhaeit von Reinsperch minem herren bihschof Emichen von Frisingen aller der rede vnd rehtes div an dirrer hantvest vor geschriben sint vnd mit worten auz genomen sint, daz ich daz staet vnd wor hab vnd swo ich des niht entaet da gig(!) ich mich schuldich aller der rede vnd des rehtes daz an dirrer hantveste vor geschriben vnd vertaeidingt ist. Vnd dar vm daz dirrer sazz vnd disiv verebenunge zwihschen minem herren dem bihschof vnd mir dester grozzer staete hab, han ich disen brief gegeben mit minem hangendem insigel. Disiv verebenung ist geschehen des jares da (nach) Christes geburtte was tausent zwey hvndert vnd niun vnd ohzich iar, der Mitichen in der Osterwochen, in der stat ze Waydhouen. Bi der ver rihtegung sint dis ziuge gewesen graf Gerhart probst von sand Andre, graf Emich probst von Werdse, her Friderich probst von Mosburch, her Otto pharrer von Nevnhouen, maister Rudiger chorherre von sand Andre, her Ekhart Vihdorfer, her Albrecht der Proter, her Chvnrat von Vonsdorf, her Arnolt der Piber, her Otto von Mezlinstorf, Vlrich vnd Friderich von Scharffervelt, Otto vnd Albreht von Vihdorf, Vl. von Vihdorf, Jevbart von Perbortstorf, Otto von Alstorf, Levpolt Verl, Wlfinch von Randekke, Richer Wolfstain, Albreht von Aeiglarn, Hainrich Sprinzenperch vnd ander pibder(!) levt genuch.

Source Fulltext: ZAHN, Codex Diplomaticus (=FRA II/31, Wien 1870) S. 435-436