Albertus dei gratia Romanorum rex semper augustus. Vniuersis sacri Romani imperii fidelibus presentes litteras inspecturis gratiam suam et omne bonum. Ad hoc in specula regalis fastigii nos a summo rege recognoscimus collocatos, vt honorificum reipublice statum solicite promouere et subiectorum imperii commodis importunis (!) intendere liberaliter debeamus. Nam dum munificencie nostre beneplacitis eorum prosperitati prospicimus, deuocionem ipsorum excitamus ad exhibitionem promptitudinis et fidei plenioris. Ea propter obsequia grata sincerumque affectum quibus venerabilis Emcho episcopus Frisingensis princeps noster dilectus nobis hactenus adhesit et feruenter studuit complacere, ad memoriam reuocantes et sperantes, quod idem nobis et imperio gratiora prebere non cesset obsequia in futurum, eiusdem contemplationem meritorum opido et opidanis suis in Innichingen fauoris regii plenitudinem impertimur, concedentes eisdem ex habundancia gracie specialis quod in opido memorato ex nunc et in antea forum septimanale ad vsum mercationis cuiuslibet singulis quintis feriis obseruetur ad quod quidem forum euntes et redeuntes cum personis et rebus in nostram et imperii protectionem recipimus specialem et forensium eos gaudere volumus priuilegio libertatum. Nulli ergo omnino hominum liceat hanc nostrae concessionis infringere paginam aut ei ausu temerario quomodolibet contraire, quod qui secus facere presumpserit, indignationem nostram grauissimam se non dubitet incurrisse. In cuius nostre concessionis indicium euidens et memoriam sempiternam hanc litteram exinde conscribi et maiestatis nostre sigillo iussimus communiri. Datum in Nürnberg, anno domini millesimo trecentesimo tercio, idus (!) Julii, indictione prima, regni vero nostri anno quinto.

Source Fulltext: ZAHN, Codex Diplomaticus (=FRA II/35, Wien 1871) S. 20-21