Wir Rudolf van gotes gnaden herzog van Osterich vnd van Steyr, herre van Chrayn, van der Marich vnd van Portenawe veriehen vnd tven chvnt allen den di disen brief sehent oder horent lesen, daz vnser lieber getrewer Chalhoh von Eberstorf fver vns chom vnd pat vns vleizichleich mit sampt seiner havsvrowen Margareten vnd Rudolfen vnd Reinprechten sinen svnen gvten willen vnd mit gesamter hant, daz wir bestetigeten di satzvng des grozzen vnd des chlainen zehenten dacz Roehleinstorf vnd swaz daz (!) zv gehoret, ez sein holden oder swie ez genant ist, daz er versetzt hat Lebmannen dem Juden van Wiennen fver anderhalb hvndert phvnt Wienner phenning di er im gelihen hat. Daz haben wier getan durch ir baider pete willen vnd haben di selben satzvng lazzen zv gen mit dem gelvbd vnd mit der beschaidenhait als ir hantvest hat vnd an ir geschriben stet, vnd sein ovch des selben gvtes rechter scherme der vorgenanten Juden Lebmans, siner havsvrowen vnd siner chind noch des landes gewonhait in Osterich vnd nach satzvng recht. Vnd dar vber ze einem gezevge geben wir disen brief versigelt mit vnserm insigel. Der brief ist geben ze Wienne da van Christes geburd waren drevzehen hvndert iar, darnach in dem dritten jar, an vnsers herren Avfert tag.

Source Fulltext: ZAHN, Codex Diplomaticus (=FRA II/35, Wien 1871) S. 19-20