Nos Emicho dei gratia episcopus ecclesie Frisingensis notum esse volumus presentium inspectoribus vniuersis, quod in presencia nostra extra formam iudicii inter se honorabilis vir dominus Otto venerabilis abbas in Sytansteten pro monasterio suo ab una et plebanus in Gestnich pro sua plebe a parte altera ad invicem disceptantes super minutis decimis in parrochia Gestnich que plebano loci de hiis cederent, annuatim, vtraque pars tamquam in compositores amicabiles compromisit in magistrum Chunradum doctorem decretorum, canonicum ecclesie Mosburgensis et dominum Heinricum militem de Winden, qui intellecta consuetudine utrisque secundum earum asserciones in ipsa plebe seruata circa percepciones decimarum sic communiter statuerunt, quod plebanus qui in Gestnich pro tempore fuerit, loco minutarum decimarum percipiat pacifice pullos, anseres, oua, caseos et fetus animalium, de aliis vero rebus super quibus discordant ad invicem, fabis videlicet, lino, bisis, papauere et ceteris consimilibus pronunciarunt, quod si res huiusmodi in parrochiis vicinis Alhartsperg, Neunhouen et Amsteten inter mitutas decimas numerentur, plebanus in Gestnich de rebus ipsis eciam decimas percipiat in futurum, alioquin cum decimis maioribus vel minutis cedant monasterio in hiis locis, ubi ad ipsum maiores noscuntur pertinere. Interim autem, quoadusque coram decano Laureacensi facta fuerit plena fides de rebus supradictis aput parrochias de quibus predictum est, computentur cum decimis maioribus vel minutis, quelibet pars in possessione perceptionis decimarum maiorum vel minorum nullatenus molestetur, sed eas percipiat ut confirmetur. Ad quorum euidenciam nostro sigillo presentes iussimus consignari. Datum in Waidhouen, anno domini M. CCC. X., in vigilia Omnium sanctorum.

Source Fulltext: ZAHN, Codex Diplomaticus (=FRA II/35, Wien 1871) S. 59-60