Ottobonus dei gratia sancte sedis Aquilegensis patriarcha. Dilecto filio magistro Chunrado decretorum doctori, canonico Mosburgensi, capellano venerabilis patris domini E. episcopi Frisingensis salutem et benedictionem in domino. Litterarum scientia, uite ac morum honestas aliaque uirtutum merita que tibi suffragari noscuntur, nos inducunt ut te prerogatiua specialis gracie prosequamur. Volentes igitur tum ob hoc, tum etiam obtentu venerabilis patris domini episcopi antedicti nobis super hoc cum instantia supplicantis, te prosequi fauore benigno, plebem sancti Martini prope Chrainburch nostre Aquilegensis diocesis, vacantem per obitum Vlrici de Vildenlok olim ipsius plebis plebani, tibi duximus cum omnibus iuribus, spiritualibus et temporalibus ad eam spectantibus de speciali gratia conferendam, te in nostra presentia constitutum inuestientes per nostrum anulum de eisdem, ac mandantes te in ipsius plebis et iurium predictorum corporalem possessionem induci, iure reuerendi patris domini P. de Columpna sancte Romane ecclesie cardinalis, si quod sibi in eadem plebe competit semper saluo. In cuius rei testimonium presentes litteras sigilli nostri pendentis (!) munitas tibi duximus concedendas. Datum Vtini, die XVI. Marcii, sub anno natiuitatis domini millesimo trecentesimo XI., none indictionis.

Source Fulltext: ZAHN, Codex Diplomaticus (=FRA II/35, Wien 1871) S. 60