Ich Rv^odolf von Eberstorf ver gih vnd tv^on chunt allen den di disen prief lesent oder hoernt lesen, di nv lebent oder her nah chunftich sint, daz ich mit meines vater gu^otem willen di zehenten di ich wider Lebman den Juden ze Wienne chaufet han vmb drev hundert phunt phenning Wienner mvnzze, grosse oder chlayn, di da ligent datz Pilichdorf vnd datz Wentlingen vnd datz Perbolczdorf, di lehen sint von meinem herren pischolf Wernharten von Passaw, vnd di zehent datz Rehleisdorf di lehen sint von meinem herren hertzog Friderichen von O^esterreich, di vorgenanten vier zehent di han ich meiner hovsvrowen vrowen Margreten vnd irn chinden mit allem dem recht geben als ich si gehabt han von meinem herren dem hertzogen vnd von meinem herren pisscholf Wernharten von Passaw, also mit ovsgenomner red, ob ich niht enwer, dez got niht engeb, so schol si di zehent inne haben di wil si an man beleibet, waer aber daz, daz si einen man naeme, so schulen si halb ir sein vndz an irn tod, vnd meiner chinde halb, vnd swanne si niht en ist, so schuln si meiner chinde gar sein, vnuerzigen meines vatter reht hern Chalhohen von Eberstorf als vnser paider prief gegen ein ander sagent. Vnd dar vber durch pezzer sicherhait gib ich ir disen prief versigelten mit meinem insigel vnd mit meines vatter insigel dem disev sach wol chunt ist. Diser prief ist geben do von Christes geburt ergangen warn tavsent iar, drev hvndert iar, dar nah in dem ainliften iar, an sant Barthlomes tach.

Source Fulltext: ZAHN, Codex Diplomaticus (=FRA II/35, Wien 1871) S. 60-61