Wir Geotfrid von gotes genaden bischof ze Frisingen veriehen vnd tv^on chunt allen den die disen brief sehent, hoerent oder lesent, daz wir vnserm besundern dienaer Reinpreht von Eberstorf der vnser burchgraf vnd pfleger ist ze Enczestorf, vollen vnd ganczen gewalt gegeben haben vnd geben mit disem brief vns vnd vnser gotshaus laeut vnd gut daz wir haben in Oesterreich ze verantwuerten vnd ze versprechen vor venserm lieben herren dem edlen herczog Friderich von O^esterreich vor sinen lantaeidingn, vor sinen hoftaeidingen vnd auch einem iegleichen rihter vnd vor einem iegleichen geriht das gelegen ist in Oesterreich, an aller der ansprach die vor in an get vns, venser gotshaus laeut oder gu^ot, daz er dar an vensrer stat vns gewaltichleich vnd gaenczleich gen einem iegleichem chlager versprechen vnd verantwerten mveg, ze gewinne vnd ze verluestt. Wir geben im auch gewalt mit disem brief, daz er an vensrer stat vor dem vorgenanten vnserm herren dem herczogen vnd auch vor einem iegleichen rihter als oben auz genomen ist, vns, vnsern laevten vnd gu^ot daz reht vordern vnd genemen mveg von einem iegleichen man, swie der genant ist, da wir, vnser gotshaus oder vnser laeut iht hin ze sprechen haben, vnd swaz. er fuer vns an den selben sachen taeidingt oder tv^ot, daz haben wir gern staet vnd vnzerbrochen. Vnd dar veber ze einem vrchvende geben wir disen offen brief mit vnserm hangendem insigel versigelten, der geben ist ze Enczestorf do man zalt von Christes gebuert drevzehenhundert iar dar nah in dem zwelften iar, des Maentags vor sant Merteins tag.

Source Fulltext: ZAHN, Codex Diplomaticus (=FRA II/35, Wien 1871) S. 65