Ich Greif von Reutenberch vergich offenleich an disem prief daz ich von meins herrn wegen graf Hainreichs von Gortz mit herrn Otten von Liechtenstain von meines herrn wegen bischolf Gotfrides von Vreising, wan ez vns paidenthalben mit vollem gewalt enpholhen wart, verriht, verebent vnd vertaidingt haben vmb den schaden, der meins herrn leuten von Gortz, Merchlein vnd Chu^onraten vnd Fridreichen vnd Hainreichen den pru^odern von Ige vnd der vrawen von Hophenbach, frawen Sophein des Albrechtes von Hophenbach hausvrawe, vrawen Christein, vrawen Isalden vnt vrawen Elspeten da selben geschehen ist in dem vrleuge daz meines herrn von Vreisinge vorvar bischof Emch auf der March mit mir vnt mit meinem pru^odem gehabt hat, also daz mein herre von Vreising den vorgeschriben leuten geben scholt zwo^e vnd sibenzch march Aglaier der auch er si genzlich gewert hat an allen schaden. Desselben gu^ots sint gevallen den vorgenanten bru^oder von Ige zwainzch march, frawen Sophein zwoe vnd dreizch march vnt den andern drein witwen di vor genant sint zwainzch march also, daz si sich vmb allen schaden den si genomen habent in dem selbem vrleuge, fuer sich vnd alle ier erben genczlichen verzigen habent hinz dem oft genanten meinen herren von Vreising vnd hinz seinem gotshaus vnt wir die vor geschriben Merchlein, Chu^enrat, Fridereich vnd Hainreich die brueder von Ige vnt auch ich Alber von Hophenbach an meiner hausvrawen stat frowen Sophein vnd wir die vorgenanten witwen Christein, Isald, Elzbeht veriehen der vorgenanten taidinch vnt haben auch si willich vnt stet vnt veriehen auch daz wir des vorgeschriben gu^otes genzleichen gewert sein vnt haben vns verzigen vnt furzeihen vns fur vns vnt fur alle vnser erben aller ansprach vnt (!) den schaden als oben geschriben ist, vnt dar vber geben wir disen brief versigelten mit vnser vrevnde insigel der Reutenberger Ortolfs vnt Greiffen vnt mein Albers von Hophenbach vnt mit vnserm insigel der bru^oder von Ige. Der prief ist geben ze Lonk da von Christes geburt ergangen waren drevzehen hundert iar vnd dar nach in dem drevzehenten iar, an Vnser vrowen tag als si geborn wart.

Source Fulltext: ZAHN, Codex Diplomaticus (=FRA II/35, Wien 1871) S. 73-74