Ich Reimprecht von Eberstorf vergich vnd tvn chvnt allen den die disen prief lesent oder horent lesen, die nv lebent vnd hernach chvnftich sint, daz ich mit meines prveder her Ruedolfes von Eberstorf chamerer in Osterreich gvtem willen vnd gvnst, mit verdachtem mvet vnd mit gesampter hant zv der zeit do ich iz wol getvn mocht, gesatz (!) han meines rechten lehens meiner havsvrowen vron Katreyn fvr die margengab die si mir gegeben hat vnd die ich ir hin wider gegeben han, fvr achzehen hvndert phvnt Wienner phenning die zway dorfer Wolfpaizzing vnd Rvetzzendorf vnd swaz dar zv gehort, also beschaidenleichen, waer daz daz ich her wider nicht enchaem, des got nicht engeb, swenne denne mein prveder her Rvedolf von Eberstorf oder sein erben gebent meiner havsvrowen vron Katreyn achzehen hvndert phvnt Wienner phenning, so sol daz vorgenant gvet alles in von meiner havsvrowen vron Katreyn aller dinch ledich sein. Ich han avch meinem prveder hern Rvedolfen von Eberstorf gelobt mit meinen triwen zehant swenne mich got her wider gesent, daz ich mich mit im nach vnser paider vrevnt rat vereben vnd verrichten sol an alle wider rede vnd an allen chrieg, vnd wand dise sache mit meines prveder gvtem willen geschehen ist, dar vber so gib ich meiner havsvrowen vron Katreyn disen prief zv ainem sichtigen vrchvnde vnd zv ainem waren gezevg diser sache, versigelten mit meinem insigil vnd mit mit meines prveder insigil hern Rvedolfes von Eberstorf der diser sache gezevg ist, mit seinem insigil, vnd sint avch des gezevg her Dietreich von Pilichdorf zv den zeiten hove marschalich, her Chvnrat von Potendorf, her Seibot von Potendorf, her Otte von Zelking, her Marichart von Mistelbach vnd ander frvm levte genvech den dise sach wol chvnt ist. Diser prief ist geben ze Wienne do von Christes gebvrt waren ergangen drevzehen hvndert iar, in dem drevzehenten jare dar nach, an sand Bartholomes abent.

Source Fulltext: ZAHN, Codex Diplomaticus (=FRA II/35, Wien 1871) S. 72