Ich Voelchel von Hag vergih mit disem brief, daz ich geantvrtt vnd gesetzet han meinem gnaedigen herren dem ersam bischof Chu^onrat vnd seinem gotshous ze Frising meinen hof ze Elspach den ich ze lehen han von im vnd von dem gotshous, mit allev dev daz dar zu^o gehoert, besu^oht vnd vnbesu^oht, vmb dreizzich pfunt alter Wienner pfenning, der auch ich gaenczlich gewert bin, vnd sol er vnd sein nahchomen den selben hof inne haben als ander sein vrbor. Swa auch ich oder mein erben den selben hof niht loesen vmb die vorgenanten pfenning von nu sant Marteins tach inner zwayn iaren, so veruellet sich der hof dem vorgnantem meinem herren vnd dem gotshous ze Frising ledichleich vnd gaenczleich ze rehtem aeigen. Dar veber gib ich disen brief mit hern Otten von dem Wasen vnd mit Marquarts von Lvehsnek meins vetern insigeln versigelten, der geben ist ze Waidhouen do man zalt von Christes gebvert drevczehnhvndert iar vnd dar nach in dem sehczehnden iar, des Erytags vor sant Marteins tach.

Source Fulltext: ZAHN, Codex Diplomaticus (=FRA II/35, Wien 1871) S. 94