Ich Jaekel von Wipach vergih mit disem brief allen den die in sehent oder hoerent lesen, daz ich mich mit lavterm willen an twangsal vertaidingt, verrihtet vnd verebent han nah meiner besten frevnde rat mit meinem herren dem ersamen bischof Chv^onrat von Freising vmb allen den schaden den ich genomen han von der porgschaft wegen die ich getan hiet den Lv^ogern vnd andern ir helfern fuer den Luellen burger ze Lok vnd für einen andern meins herren des bischofs gebovrn der mit dem Luellen gevangen was, also daz ich mich vertzigen han vnd vertzeih mit disem brief fuer mich, fuer mein erben vnd fuer alle min frevnde allez des schadens den ich genomen han an leib oder an gu^ot, swie der genant ist, von der selben porgschaft vnd auch von der vanchnvess die mich meins herren des bischofs gesinde an gelegt hat, vnd sol ich noh dehain mein erbe oder nyeman ander von meinen wegen fuerbaz dehainerlay ansprach vmb die sache habn noch gewinnen hintz dem vorgenanten meinem herren dem bischof vnd dem gotshovs ze Frising. Ich bin auch frevnt worden lavterlich aller der die meiner vanchnuesse schuldich sint, mit worten oder mit werchen, swie die genant sint, vnd dar veber gib ich disen brief versigelten mit meinem insigel vnd mit der erbern herren hern Wilhalms von Scharfenberch, hern Reynhers des schenken von Osterwitz, hern Rueger vnd hern Marquardes von Pilchgretz vnd meins frevnts Georin des Legspans insigeln. Der brief ist gebn ze Lok do man zalt von Christes gebvrt drevtzehn hvndert iar vnd dar nah in dem achtzehnden iar, des naehsten Maentags vor Svnwenden.

Source Fulltext: ZAHN, Codex Diplomaticus (=FRA II/35, Wien 1871) S. 108-109