Reuerendo in Christo patri et domino Chu^onrado dei gracia Frisingensis ecclesie episcopo Otto dei et apostolice sedis gracia abbas monasterii sancti Lamberti ordinis sancti Benedicti Salczburgensis dyocesis executor ad infrascripta vna cum aliis collegis nostris a sede apostolica deputatus salutem in domino et mandatis nostris immo uerius apostolicis firmiter obedire. Noueritis nos receptis reuerenter litteris apostolicis a venerabili viro domino Friderico de Gloyach Colocensis et Frisacensis ecclesiarum canonico super prouisione sibi facienda de beneficio ecclesiastico quod ad nostram collacionem, prouisionem sev quamuis aliam disposicionem pertinet, impetratis litteris quoque processus venerabilis viri magistri Petri Fabri sanctissimi domini pape notarii vnius collegarum nostrorum, quarum quidem litterarum tenor per honorabilem virum dominum Leopoldum de Gloyach canonici (!) Frisacensis procuratorem domini Friderici predicti vt ipse asserit, ostensus est et copia vobis facta ad eiusdem procuratoris instanciam et peticionem, ecclesiam parrochialem ad Lok Aquilegiensis dyocesis tunc de iure et de facto vacantem per mortem prepositi Frisingensis dicti de Seueld quam coram nobis infra mensem legittime acceptauit, sibi presenti loco dicti domini Friderici absentis auctoritate apostolica nobis commissa contulisse et inuestisse de eadem et in corporalem possessionem pariter induxisse, in contradictores et rebelles execucionis et in ecclesiam predictam in Lok ad cuius possessionem pacificam et quietam admissus non extitit, interdicti sentencias proferendo ac eciam nunciando. Vos ergo quem ob reuerenciam vestre dignitatis nolumus prefata nostra sentencia sic ligari, rogamus, hortamur in domino et monemus vobisque in virtute sancte obediencie auctoritate predicta districte precipimus et mandamus, quatenus infra sex dierum spacium quorum duos pro primo, duos pro secundo et reliquos duos pro tercio et peremptorio termino ac monicione canonica prefigimus et eciam assignamus, eundem dominum Fridericum uel procuratorem suum cuius nomine ad prefatam ecclesiam in Lok et corporalem possessionem ipsius ac iurium et pertinenciarum eius infra predictum terminum recipiatis et eciam admittatis et defendatis inductum, amoto exinde quolibet detentore quem nos eciam ad cautelam tenore presencium amouemus et denunciamus amotum, sibique uel suo procuratore pro ipso de ipsius ecclesie fructibus, redditibus, prouentibus, iuribus et obuencionibus vniuersis faciatis integre responderi. Quodsi premissa forte non adimpleueritis uel contra ea uel aliquid eorum feceritis per uos uel per submissam personam aut dominum Fridericum super premissis in aliquo impediueritis aut impedientibus ipsum dederitis auxilium et consilium uel fauorem publice uel occulte quominus idem dominus Fridericus sepedictam ecclesiam cum omnibus iuribus et pertinenciis suis integre ac pacifice assequatur et pacifice valeat possidere ac fructibus, redditibus et prouentibus libere cum integritate percipere, predicta monicione premissa in hiis scriptis ingressum ecclesie interdictum, si vero predictum interdictum per alios sex dies prefatos sex immediate sequentes sustineretis, vos suspendimus de diuinis, verum si prefatas interdicti et suspensionis sentencias per alios sex dies prefatos duodecim immediate sequentes sustinueritis animo indurato, vos propter contemptum huiusmodi predicta monicione premissa in hiis scriptis excommunicacionis sentencia innodamus, absolucione vestri si supra scriptas sentencias nostras uel earum aliquam incurreritis quoquomodo, nobis uel superiori nostro tantummodo reseruata. In cuius rei euidenciam et testimonium presentes scribi fecimus et sigilli nostri munimine roborari. Datum et actum in Prukka, sub anno domini millesimo CCC. XIX., XVII. kalendas Januarii.

Source Fulltext: ZAHN, Codex Diplomaticus (=FRA II/35, Wien 1871) S. 115-117