Wir Chunrad Schilher vnd Lienhart (sein) brueder von Lok vergehen vnd tv^on chvnt allen den die disen brief sehent oder hoerent lesen, daz wir vnserm liebem vnd genaedigen hern bischof Chv^onr. von Freising vnd seinem gotshavs versatzt haben drey hv^oben ze Nevsaezz die vnser lehent sint von dem gotshaus, vmb vier vnd zwaintzech march Agliger (!) phenning, der wir gentzleich gewert sein von hern Johans schreiber ze Lok. Die selben drey hv^oben schol vnser vorgenanter herr der bischof vnd sein nachchomen mit vnserm vnd aller vnserr erben gvetem willen inne haben vnd niezzen als ander sein vrbor ze Nevsaezz, besuochtz vnd vnbesuochtz, vntz wir oder vnser erben die vorgeschribenn drey hv^oben reht vnd redleich gelo^esen. Avch hat vns vnser vorgenanter herr der bischof die genade getan, daz wir die selben hv^oben geloesen mugen vmb die vorgenanten vier vnd zwaintzech mareh Agliger phenning an sand Georn tag, swelichs jars daz sei, die weil des niht geschiht, so schullen vnserm vorgenanten herrn dem bischof vnd dem gotshavs die selben hv^oben gentzleich dienen vnd sehullen wir damit niht ze schaffen haben. Vnd dar veber ze ainem vrchvnde der warhait geben wir disen prief versigelten mit vnser baider hangenten insigel. Der prief ist geben ze Lok dv man zalt von Christ gewurt drevtzehen hvndert iar, dar nach in dem ainem vnd zwaintzigistem jar, an sand Georen tag.

Source Fulltext: ZAHN, Codex Diplomaticus (=FRA II/35, Wien 1871) S. 125-126