Ich Levpolt von Sachsengange vnd ich Chvnigunt sein havsvrowe wir veriehen vnd tun chunt allen den die disen prief lesent oder horent lesen, die nv lebent vnd hernach chvnftich sint, daz wir mit vnser erben gutem willen vnd gunst vnd mit gesamter hant zv der zeit do wir ez wol getun mochten vnd mit vnsers lehen herren hant pischolf Chvnrades von Freysingen vnsers rechten lehen des wir von im haben gehapt, daz dorf Teymendorf vnd alles daz dar zv gehoret in vrbar, ze holtz, ze velde vnd ze dorf, ez sei gestift oder vngestiftet, versucht oder vnversucht, swie so daz genant ist, daz haben wir allessamt verchavft vnd geben mit allem dem nvtz vnd recht als wir ez in lehens gewer her pracht haben, vmb sechzich phvnt Wienner phenninge der wir recht vnd redlichen gewert sein, dem erbern herren hern Reymprechten von Eberstorf vnd seiner havsvrowen vron Katreinen vnd allen irn erben ledichlichen vnd vreilichen ze haben vnd allen irn frumen da mit ze schaffen, verchavffen, versetzzen vnd geben swem sic wellen an allen irresal. Vnd dar vber ze ayner pezzern sicherhait so setzzen wir vns ich Leopolt von Sachsengange vnd ich Chvnigunt sein havsvrowe vnverschaydenlichen hern Reymprechten von Eberstorf vnd seiner havsvrowen vron Katreinen vnd irn erben vber daz vorgenant gut alles ze rechtem scherme fur alle ansprache als lehens recht ist vnd des landes recht ze Osterreiche, vnd geben in dar vber disen prief zv aynem sichtigen vrchvnde vnd zv aynem offen gezevge vnd zv ayner ewigen vestnvnge diser sache versigilten mit vnserm insigil vnd mit hern Rvdelfus insigil von Eberstorf chamrer in Osterreiche vnd mit meiner vetern insigil Hertneides von Sachsengange vnd seines prvder Rvdolfes die diser sache gezevg sint, mit ir insigiln vnd ander frome levte genvch. Diser prief ist geben ze Wienne do von Christes gebvrt waren ergangen drevzehen hvndert iar, in dem ayn vnd zwentzzigistem iare dar nach, des naehisten Mittichens vor sand Barthelmes tage.

Source Fulltext: ZAHN, Codex Diplomaticus (=FRA II/35, Wien 1871) S. 126-127