Ich V^olreich Schikch vergih vnd tu^on chunt allen den die disen brief sehnt oder hoerent lesen, daz ich nach der erbern manne Goetfrides von (!) Anuelt vnd Marquardes von Luehsnekk schidung, taiding vnd berihtigung gar vnd gaenczlich von des gotshovs wegen von Freising verriht vnd gewert bin aller meiner dienst vnd schaden die ich weilent meinem herren bischof Chu^onraden auf gen Bayrn getan han, vnd verczeih (mich) fuerbaz aller vordrang vnd ansprach fuer mich, fuer alle min erben, frevnt oder diener vnd besunderlich fuer Oertlein der die selbn rays gen Freising mein diener was mit einem armbrust, fuer den selbn ob er daz gotshv^os mit dem rehten an spraech, gehaiz ich daz gotshu^os ze vertretten vnd ze verantwrten, wolt aber er mu^ot willn vnd anders denne mit dem rehten daz gotshv^os pfrengen, daz sol ich vndersten mit leib vnd mit gu^ot, als verre ich mach. Vnd dar vmbe paidev fuer mein dienst vnd schaden, mein vnd meins vorgnanten diener, swie wir die enpfangen habn in des gotshv^os dienst an rossen oder andrer habe, han ich enpfangen von dem erbern herren hern Emchen von Alczey chorherren vnd pfleger des gotshv^os ze Frising fuemf vnd zwaeinczich pfunt Wienner pfenning von des gotshv^os wegen an andern meinen solt des ich vor malen von dem bischof beriht wart. Dar veber gib ich disen brief versigelten mit meinem insigel vnd ze bezzerr gewarhait mit der erbern herrn Haertneids des Chveliber vnd hern Chu^onrats des burgrauen von Sevsenek insigeln die si durch mein bet an disen brief gehengt habnt. Des sint auch geczevge her Alrman (!) rihter ze Amsteten, die vorgnanten Goetfrid Anuelt vnd Marquart Luehsniker, Perhtolt von Naenhouen, Chu^onrat der rihter von Waidhouen vnd ander erber levt. Der brief ist gebn ze Waidhouen an sand Blasien tag, do man zalt von Christes geburt dreuczehn hundert jar, dar nach in dem dritten vnd zwainczgisten jar.

Source Fulltext: ZAHN, Codex Diplomaticus (=FRA II/35, Wien 1871) S. 129