Ich Ott Windischendorfer mit samt meinen geswistroeden Volchmarn, Weymarn, Johansen, Margreten, Liebgarden vnd Katherein vergihe vnd tu^on chunt allen den die disen brief sehent oder hoernt lesen, daz ich reht vnd redleich mit gu^otem willen aller meiner geswistrede verchauffet vnd gegebn han dem ersamen herren hern Emchen von Alczey chorherren vnd pfleger des gotshovs ze Freising an eins bischofs stat mein hv^ob vnd mein lehen dacz Snoczendorf dev ich von dem gotshovs ze Freising ze lehen han gehabt, vmb zehen pfunt alter Wienner pfenning der ich ganczlich gewert bin, vnd han im dev selben gu^ot ovf gebn, besu^oht vnd vnbesu^oht, mit allem dem daz dar zu. gehoert. Doch hat er mir die genade getan, daz ich oder mein geswistroed dev selben zway gu^ot wider chavffen mvegen vmb zehen pfunt pfenning von sant Michels tag der schirst chvmt, inner vier iaren, ye des iares vierczehn tag vor sand Michels tag oder vierczehn tag hin nach, vnd sol auch ich dev selbn zwai gu^ot die weil inne habn vnd sol meinem herren dem bischof allev iar an sant Michels tag da von dienen hincz Vdmaruelt ein pfunt newer pfenning an wider rede, vnd ist daz ich oder mein geswistroed dev vorgenanten zway gu^ot wider chauffen in den vier iaren, vierczehn tag vor sant Michels tag, so sol ich dennoch den vorgenanten dienst an sant Michels tag nah der losung gebn, ist aber daz dev losung nah sant Michels tag geschiht vierczehn tag, so ist man dar nah dehaeins dienstes schuldich. Waer aber daz ich noch mein geswistroede in den vorgnanten vier jaren niht widerchavften, so habnt sich dev vorgeschriben hu^ob vnd lehen veruallen meinem herren dem bischof vnd dem gotshovs aigenlich vnd ewichleich, also daz ich noh mein geswistroed dehaein ansprach da nah habn suelln. Vnd dar veber gib ich disen brief versigelten mit Marquardes des Luehsneker, mit Hermans Haesibs vnd mit Chu^onrats des Proter insigeln, wan ich selb aigens insigels niht han. Der brief ist gebn ze Vdmarueld, do man zalt von Christes gebvrt dreuczehn hundert iar, dar nah in dem dritten vnd zwainczgisten iar, an sant Erasmen tag.

Source Fulltext: ZAHN, Codex Diplomaticus (=FRA II/35, Wien 1871) S. 130-131