Ich German der Stoerenwirt vergih offenleich an disem prief vnd tv^on chunt allen den die in sehent oder horent lesen, daz mich mein lieber herr her Emch von Altzey chorherr vnd phleger des gotshavs ze Freising schon vnd gentzleich avz geriht hat meines dienstes den (ich) meinem herrn saeligem bischof Chvnrad vnd seinem gotshavs ze Freisingen getan han, vnd auch alles des schaden (den) ich in dem dienst enphangen han, daz ich noch mein erben furbaz gegen dem gotshavs ze Freisingen chain anspra(che) noch fordrung dar vmb niemer haben schullen. Auch offen ich daz, daz ich die ansprach die Oesel gehabt hat (vmb) einen hengst dar auf er tails gegehen (!) hat, auch auf mich genomen han, also daz ich daz gotsha(vs ze) Freisin(gen) gen Oeslein vertreten wil. Daz daz also staet vnd vnuerbrochen beleibe, gib ich disen offen prief besigelt (mit m)eins oeheims hern Marquarts von Pilchgratz hangentem insigel der ez durch mein pet dar an gelegt hat; vnd (auch) mit meinem hangentem insigel. Der prief ist geben ze Lok dv von Christes geburt ergangen waren drevzehen hvndert iar dar nach in dem dritem vnd zwaintzigistem iar, des Samstags vor aller heiligen tag.

Source Fulltext: ZAHN, Codex Diplomaticus (=FRA II/35, Wien 1871) S. 131