Ich Alram von Reykerstorf richter ze Amsteten vergih an disem brief vnd tu^on chunt allen den die in an sehent oder hoernt lesen, daz ich mit guetlichem willen iunchfrawen Alheiten Fridreichs des Fribrechsteter tochter die ich inne han, vnd nach rat vnd wol verdachtem mut aller irrer friund verchouffet vnd hin geben han alles daz gut daz si gehabt hat ze Fribrechsteten, pesu^ocht vnd vmbesu^ocht (!), von ires vorgenanten vater Fridreichs vnd irrer mu^otter Gerdrauten wegen, des gotshous amptleuten von Freising vmb fuemfczich pfunt alter Winner pfenning der mich Pernhart der chastner von Vdmaruelt gaenczlich gewert hat von des gotshous wegen von Freising, vnd hat auch die vorgnante iunchfrawe Alheit daz selbe gu^ot au^of geben den amptleuten ledichleichen vncz an einen chuempftigen bischof, swenn der zv dem lande chumt so sol si im daz gu^ot au^of geben als vol recht sein aigenhafts gut vnd sol auch fuerbaz dhein ansprach darnach haben. Vnd daz daz staet beleib, gib ich disen offen brif mit meinem insigel vnd ze einer pezzeren gewarheit mit des erbern mannes hern Wernhartes von Schafferuelt insigel versigelten. Des sint auch geczeug Goetfrid der landrihter von Chu^onratsheym, Marquard der Luechsnekker, Hermann der Hesib, Pernhard der chastner, Otte der Taeuschelman, Chu^onrad der Taeutter purger ze Amsteten vnd ander erber leute genu^og. Daz ist auch geschehen do man zalt von Christes gepuerd dreuczehen hundert jar, darnach in dem vierden vnd zwainzigistem jare, des naehsten Pfincztags vor sant Johannes tag des taeuffer.

Source Fulltext: ZAHN, Codex Diplomaticus (=FRA II/35, Wien 1871) S. 134-135