Ich Weichart vnd Hainreich vnd ich Goetfrit di prueder von Hertstetten wir vergehen vnd tvn chunt allen den di disen prief lesent oder hoernt lesen, di nv lebent oder her nach chunftich sint, daz wir mit verdachtem mv^ot vnd mit zeitigem rat vnd mit gesampter hant vnd ze den zeiten do wir iz wol getv^on mochten, vnd mit aller vnserr erben gu^otem willen vnd gunst verchauft haben vnsers rechten lehens dreyzzich metzzen waitzzes di da ligent datz Teymendorf ovf ainem lehen der dreyzzich phenning leichter ist danne prehwaitz, vnd ovf dem selben lehen ain phunt phenning geltes vnd da selben sechs schilling Wienner phenning geltes vnd allez daz weisaet daz dar zv^o gehoert, dem erbern herren vnserm herren hern Reymprechten von Eberstorf oberistem chamerer in Osterreich vnd seiner hovsvrowen vrowen Kathreyn vnd allen ir paider erben ze versetzzen, ze verchauffen vnd ze geben swem si wellent, vnd allen irn frumen da mit schaffen als iz in wol chom vnd fveg, vmb zwai vnd zwaintzzich phunt Wienner phenning der wir recht vnd redleich sein gewert, vnd loben ovch dem vorgenanten hern Reymprechten vnd seiner hovsvrowen vrowen Kathreyn vnd allen ir paider erben vber daz vorgenant gu^ot rechten scherm als dez landes recht ist in Osterreich, fvr alle ansprach. Vnd dar vber so geben wir dem vorgenanten vnserm herren hern Reymprechten vnd seiner hovsvrowen vrowen Kathreyn vnd allen ir paider erben disen prief ze ainem sichtigen vrchund vnd ze ainem waren gezevg diser sach versigelten mit vnsern insigeln. Dez sint gezevg Dietreich von Stadlawe, Hekche von Asparn, Pilgreim Reymprechtes svn ovf dem Gang datz Eberstorf ze den zeiten purkgraue datz Entzestorf, Vlreich der Ryedmarcher ze den zeiten purgraf datz Portz vnd ander frvm levtte genu^och den disev sach wol chunt ist. Diser prief ist geben datz Eberstorf da von Christes geburt ergangen warn drevzehen hundert jar, dar nach in dem fvmf vnd zwaintzzigistem jar, an dem Phinztag nach sant Gilgen tach.

Source Fulltext: ZAHN, Codex Diplomaticus (=FRA II/35, Wien 1871) S. 146-147