Ich Carl der Rech von Luiffenberch vergihe offenlich an disem prief vnd tun kunt allen den die in ansehent oder hoerent lesen, daz ich mich gen meinem gnaedigen herren hern Chu^onrad von Clingenberch erweltem vnd bestaettem bischof ze Frisingen vnd gen seinem goczhause ze Frisingen der nach geschribenne lehen, leute vnd gueter vnd swaz darzv^o gehoert, ze velde vnd ze dorfe, gepawen oder vngepawen, gaenczlich vnd gar verzihe vnd verzigen han, vnd ausser mich der selben gueter vnd levte dvi mich anchomen sint von frawen Cristein weilent meiner wirtenne vnd dvi si von irem vordern wirte hern Haertweig saelig dem Wasner mit gemaechte ze ainem leiptinge anchomen waren, vnd erkenne daz ich darzv^o dehainen fu^og, wech oder vordrunge nach rehte solt noch maht gehaben, vnd sint dui selben gueter benant, des ersten ze Ludwiges oede ain lehen, ze Tobersteten auf dem perig ein lehen, da selben auf dem Staincheller ein hof, da selben in dem Freythofe ain lehen, ze Waldemansdorf ain hu^obe, in dem Erlach ein lehen, an dem Aigen in der Zauche ain lehen, an der Hu^obe ain hu^obe, auf dem Hungersberge ain hu^obe vnd auf dem Schoenenpuihel zwai lehen, vnd darzu^o von gnaden vnd durch dienst die ich im vnd seinem goczhause immer gern tu^on wil, vnd ouch darumb ob ich dehain reht gehebt hetti (!) ze den vorgenanten guetern vnd levten, git er mir fünf vnd drissig phunt Wienner phenninge der ich auch gänczlich von im vnd sinem goczhuse ze Frisingen gewert pin. Vnd daz ich oder ieman fuirbaz von minen wegen an den vorgeschribenne levten vnd guetern dui in vnd sein goczhaus ze Frisingen mit allem reht angehoerent, irre, beswaere oder bekrenche, darumb ze ainem vrkuinde der warhait vnd bedaehtnuisse gib ich im vnd sinem goczhause disem (!) prief versigelt mit minem vnd mit mins lieben herren hern Johans von Capelle, hern Hainrichs von Roetenberg vnd der beschaidenne ritter hern Haertnits des Kuilwers vnd hern Alrans (!) des rihters von Amsteten insigel di daran hangent, die avch baide herre Haertnit vnd herre Alran der selben sache vnd berihtunge mitter vnd taidinger sint gewesen. Wir Johans von Capelle, Hainrich von Roetenberg, Haertnit der Kuilwer vrid Alran der rihter von Amsteten durch lieb vnd bete des erbern ritters hern Carln des Rehen vergehen wir, daz wir vnservi insigel haben gelait an disem prief zu^o ainer merer sicherhait vnd vrkunde als hie vor geschriben stat Daz beschach vnd wart dirre brief geben ze Waidhouen do man zalf von gotes gebuirte druiczehenhundert jar, darnach in dem fuinf vnd zwainczigosten jar, an dem Maentage nach Aller hailigen tach.

Source Fulltext: ZAHN, Codex Diplomaticus (=FRA II/35, Wien 1871) S. 147-148