Ich Vlrich Gru^ober burger von Judenburg vergih vnd tun chunt allen den die disen brief sehent oder hoernt lesen, daz ich willichlichen vnd mit verdahten mu^ot meinem gnaedigen herren dem ersamen hern Chunr. von Chlingenberch erwelten vnd bestaeten bischof ze Frisingen in sein hant, im vnd seinem gotshous ouf gegeben han ein swaig dacz Hinderek dev vor mein rehtez aigen ist gewesen, vnd han dar nach die selb swaig von minem vorgenanten hern enpfangen ze rehtem lehen, also daz ich vnd alle mein erben, sven vnd toechter, die ez ze recht erben suellen hinnan fuer, daz selbe gu^ot nah lehens reht enpfahen vnd inne haben sueln von minem hern dem bischof vnd dem gotshous ze Frisingen, vnd dar veber gib ich disen brief mit minem hangenden insigel versigelten. Des sint ouch getziugen die erbern hern graff Levtolt von Schovnberch probst ze Ardacher, her Emche von Alczai probst ze Werdse, her Nyclaus priester schaffer ze Welcz, her Albrecht von Chlingenberch, her Herman von Lyebenuels, her Friderich von Weltz ritter vnd Vlrich Silberchnoll, Peter Heller vnd Reicher Chrael burger ze Welcz vnd ander piderb levt genu^og. Daz beschach ze Welcz, do man zalt von Christes gebuerd drevtzehenhundert iar vnd dar nach in dem fuemften vnd czwainczigisten iar, an sand Affren tag.

Source Fulltext: ZAHN, Codex Diplomaticus (=FRA II/35, Wien 1871) S. 145-146