Meim lieben vnd genaedigen herren heren Chvnrad dem ersam vnd lobsam forsten pyscholf zu Vreysing enpeud ich Artolf der Pruederl purger zu Sledmig mein dienst mit ganczen treuwen. Here, mit disem prief sent ich eu vnd verzeih mich vnd gib eu auf von mir vnd von meiner hausvrauwen vnd von allen mein erben die swaig vnd taz (!) reut vnd swaz dar zue gehoerd, gesuecht vnd vngesuecht, vnd swie ez genant sei vnd als ichz von euwerm voruadern pysscholf Chuenr. dem got genad, vnd euwerm godshaus enphangen han ze rehtem lehen vnd als ich daz saelwe (!) gued cheuft (!) han mit allen den eren, rehten vnd nuzzen von Seifriden hern Offen sun von Winchleren vnd allen seinen erben, vnd ist taz vorgenant guet vnd vrbar gelegen in dem Chrumpek ob Weltz vnd sizzed dar auf Hertli Wolfleins sun pei dem Valtar, vnd gib eu daz also auf, daz ir ez pehalted euwerm gotshaus ze nuzzen vnd zu eren ob ir welt, oder daz guet leihed swem ez her Nycla euwer diener vnd amptman vnd phleger zu Weltz verchauft, wand er von mir die selben swaig vnd taz gued chauft hat vm zwair min funczch (!) march silwer gewegens mit allen sachen, des er mich gar vnd genzleichen mit raehter wag gewert vnd verriht hat. Der prief ist geben nach Christes gepurde dreuzehenhundert iar, dar nach in dem segs vnd zwainzchistem iar, des Mittichens nah Perhten tag.

Source Fulltext: ZAHN, Codex Diplomaticus (=FRA II/35, Wien 1871) S. 150