Ich Herman von Swangev tu^on chunt allen den die disen brief ansehent oder hoerent lesen, vnd vergih, offenlich an disem selben brief, daz ich mich han lazzen gnuegen von minem herren bischof Chu^onrat ze Frisingen an der burchu^ote die man Perhtolde dem Colweggen ze rehter burchu^ote ze Haberberch gegeben hat, vnd sol mit mins herren ampte vnd mit sinem chasten niht ze schaffenn han, er empfelhe mirs danne sunderbar. Ich vergihe auch, daz ich minem herren gelobt han minen brief ze gebenne hie zwischent sant Jacobs tag der nv naehst wirt, an dem ich mich verbinde mit minem aide, ob ich dehainen schaden in des gotshaus von Frisingen dienst nim ald in mins herren der denn bischof ist, daz ich vnd min erben vnd enhain min diener den selben schaden vf der vorgeschribenn burch ze Haberberch niht haben suln, noch ime oder sinen nachomen darumb niht vorhaben suln noch versperren. Swa aber ich dehainen schaden naem oder min erben in des gotshaus dienst, daz sol an mines herren des bischofes, swer dann bischof ist, gnaden stan, waz er mir oder minen erben da fuir ergeczung tu^on welle vnd swaz er mir oder minen erben da fuer ergeczung von gnaden tu^ot, der sol mich oder min erben begnuegen. Ich lob auch, ob ich niht enwaer, daz min erben oder min diener die vorgenanten burch ze Haberberch minem herren bischof Cu^onrat vnd dem gotshause ze Frisingen wider antwuirt swenn er oder daz capitel ze Frisingen oder sin nahchomen die burch mit ir briefen oder mit ir gewissen boten wider vorderent, vnd gib in darumb ze troester hern Hainrichen von Ro^etenberch, hern Hainrichen von Walse, hern V^olrichen den jungen von Walse minen oehaim vnd minen sweher hern Coln von Flahsperch die mit samt mir irvi insigel an den brief den ich minem herren dem bischof geben sol, legen suln. Vnd ze ainem offenn vrchund vnd staetegung aller der dinge so hie vor geschriben ist, so geb ich minem herren dem vorgenanten bischof Cu^onrat vnd sinem gotshaus ze Frisingen disen brief besigelt mit minem vnd des vorgeschribenne (!) mines swehers insigel. Diz beschach vnd ist dirre brief geben ze Lok do man zalt von gotes gebuirt drvitzehenhundert iar, darnach in dem sehs vnd zwainczigosten iar, an dem Samstag vor sant Vrbans tage.

Source Fulltext: ZAHN, Codex Diplomaticus (=FRA II/35, Wien 1871) S. 151-152