Ich Alb. der Sam vergih an disem brief vnd tven chvnt allen den die in lesent oder horent lesen, daz ich han verchouft vnd hin gegebn dem erbern herren bischof Chvnrat vnd sinem gotshus ze Freysing miner stiefchind haus ze Holnburch vnd di schewr vnd di hofstat di dar zv gehornt, besueht vnd vnbesueht, mit alle dem reht vnd dor zv gehoeret, vnd han im vnd sinem gotshus daz hvs vnd di schewr vnd di hofstet verchouft vnd gegebn vmb an zwai sibentzk pfunt Winner pfenning vnd han daz getan durch pezzrvng miner chind willen vnd durch ir nuetz ze fuedrung, wan iz duncht mich vnd all ir frevnt daz iz pezzer vnd nvtzer dann wirs niht verchouft hieten, vnd swas ich getan han mit dem verchouffen des hvses, daz han ich getan mit rat miner chind frevnt, mit ir gvnst vnd mit ir willen minen chinden vnd miner hausvrowen ze pezzrung vnd ze nvtzz. Ich pin auch gepunden meinem herren von Freysingen, seinem gotshus vnd sinen nahchomen vntz an di zeit vnd weil daz mine chind zv ir tagen choment, so schol ich schaffn, daz mine stifchind vnd mein hausvrow daz vorgnant haus vnd schewr vnd hofstat, besuht vnd vnbesueht, mit alle den rehten di dor zv gehoernt auf gebn vnd sich des verzeichen als des landes reht ist vnd gewonhait, vnd schvllen auch dar veber ir brief gebn meinem herren von Freysingen vnd seinem gotshus oder swer dann bischof ist ze Freysingen, als si noetdurftich sind zv einem vrchvnn (!) mit ir aygen insigeln versiglt. Alle di weil des niht geschehn ist von minen chinden vnd von miner hausvrowen daz hie vor geschribn stat, so pin ich vnd mein erben gepunden minem herren von Freysingen vnd sinem gotshvs alles des hie vor geschribn stat vmb daz havs vnd vmb di schewr vnd vmb di hofstet ze versprechen vnd ze verantwurten vnd ze schermen an alle den steten vnd er vnd sin gotshavs des notdurftich sind. Wan auch ich di an zwai sibentzk pfunt mit miner chind frevnt willen vnd rat inne wil habn vntz daz mein chind vnd mein hausvrow daz volfuerent daz hie vor geschribn stet, dor vber zv einem vrchvnn gib ich disen brif meinem herren vnd sinem gotshvs versiglten mit meinem insigel. Der brif ist gegebn ze Holnburch do man zalt von Christi gepu^ord drevtzehn hvndert jar, dar nah in dem dreizkistem iar, an der (!) nasten Mitichen nah sand Jacobs tag der (!) zwelfpoten.

Source Fulltext: ZAHN, Codex Diplomaticus (=FRA II/35, Wien 1871) S. 185-186