Ich Ludwig von Zelcing ritter tuen chunt vnd vergich offenleich an disem brief allen den di in sehent oder horent lesen, daz ich mein vogtey ze Aychach vnd von ainem lehen ze Weinzuerl vnd auch von ainem lehen ze Hagawe di zue der vogtay ze Aychach gehoerent, di ich von rechter alter erbschaft ze lehen han gehabt vnd her han pracht von dem bischolf vnd von dem goczhaus ze Freysing, daz ich di selben vogtey ze Aychach han verchauft vnd ze chauffen geben meinem herren bischoff Chu^onrat vnd seinem goczhaus ze Freysing mit allen den rechten, besuecht vnd vnbesuecht, so zu der vogty (!) von alter gehoert hat, vber lauet vnd vber guet, vnd han im di selben vogtey ze Aychach auf geben vnd seinem goczhaus ze Freysing vnd han mich verzigen fuer mich vnd all mein erben aller der recht so ich vnd mein heten oder mochten gehan an der vor genanten vogtay ze Aychach, vnd han dar vmb enpfangen von meinem herren bischolf Chuenrat vnd von seinem goczhaus ze Freysing acht pfunt Wienner pfenning vnd pin auch der selben acht pfunt pfenning von im vnd von seinem goczhaus ze Freysing gar vnd ganczleich gewert, vnd han di selben acht pfunt in meinem vnd meiner erben nuecz chert vnd geben vnd han si an die loesun (!) geben meiner guetter di ich her Chuenrat dem purchgrafen von Savesenek het verseczt. Vnd zu einem woren vrchuend aller der ding als da vor geschriben stat an disem brief, so gib ich meinem herren bischolf Chuenrat vnd seinem goczhaus ze Freysing disen brief versigelt mit meinem insigel fuer mich vnd fuer all mein erben. Dirr brief ist geben ze Frevedekk, do man zalt von Christes gepurt drevczehenhundert iar, dar nach in dem zwai vnd dreisgistem iar, an der naechsten Mitwochen vor sant Michels tag.

Source Fulltext: ZAHN, Codex Diplomaticus (=FRA II/35, Wien 1871) S. 194