Ich Ruedolf der Mocz vnd ich Gedräut sein hausvrawe mit allen meinen erben vergich offenleich an disem prief vnd tu^on chvnt allen den di in sehent oder horent lesen, daz ich mit wol verdachtem mu^ot ze der czeit du ich iz wol getu^on mocht, fuer mich vnd fuer alle mein erben vnd mit aller meiner erben gu^oten willen han verchauft vnd ze chauffen han geben reht vnd redleich meinem lieben herren bischof Chv^onraden von Freysing vnd seinem gotsthaus (!) mein mu^ol vnd daz haus vnd den garten di czu der mu^ol gehorent vnd von alter gehoert hant, besueht vnd vnbesueht, di gelegen ist ze Waidhouen ob der stat auf der Toebersnich ob der Praentleins mu^ol, di mein reht puerchreht ist von dem gotsthaus ze Freysing, vnd mein wisen di da leit endhalb der Ybs in dem V^obenpach, di mein reht pu^orchreht ist von meinem herren von Pazzawe ierleich vmb zwelif phenning, di paide mu^ol vnd wisen vnd swaz dar zve gehoert, han ich meinem herren bischof Chv^onraden vnd seinem gotsthaus ze Freysing verchauft vnd ze chauffen geben vmb vierczich phunt alter Winner pfenning der ich von im vnd von seinem gotsthaus gar vnd genczleich gewert pin, vnd di selben phenning han ich vergolten vnd geben, do ich gelten scholt do grozzer schade auf mich gieng, an Juden vnd an Christen, vnd schol auch ich vnd mein aydem Nycla der Styller der vorgenanten mu^ol vnd wisen rechter schiermer sein fuer alle ansprach als landes vnd pu^orchrehtes reht ist in Oesterreich, vnd swaz er oder sein gotsthaus ze Freysing des schaden naemen oder enphiengen, daz schol er haben auf vnz vnd auf allem dem gu^ot vnd wir haben in dem lande ze Osterreich, vncz an di czeit daz wir in vnd sein gotsthaus vnschadhaftich mahhen (!) vnd von allem schaden pringen. Doch hat mir mein herre bischof Chv^onrat di genade getan vnd meinen erben, ob ich en pin; di mu^ol vnd di wisen wider mugen gechauffen vmb vierczich phvnt alter Winner phenning ze hinnen dem naesten sand Johans tage ze Svnnewenten der nv schier ist chvmpt, vnd daz ich vnd mein aydem Nycla der Styller allez dez gebvnden sein ze tu^on vnd ze vol fu^oren vnd auz ze richten alz hie vor geschriben stat an disem prief, dar vmb haben wir vnserm herren vnd seinem gotsthaus disen prief geben versigelt mit vnsern paider insigel. Der prief ist geben ze Winn, du man zalt von Christes gepuerd driuczehen hvndert jar vnd darnach in dem zway vnd dreizgisten jare, an der naesten Mitwochen nach Aller hayligen tage.

Source Fulltext: ZAHN, Codex Diplomaticus (=FRA II/35, Wien 1871) S. 195-196