Ich Ott von Zinzendorf ritter tu^on chunt vnd vergich offenlich an disem brief allen den die in sehent vnd hoerent lesen, daz ich den hof daz vierde tail der min lehen ist gewesen von dem bischof ze Frisingen vnd von sinem gotshouse, den selben hof Wulfinch von Randekk vnd Ditrich saelig sin bru^oder von mir ze lehen hetten, daz viertail an dem selben hof vnd den hof halben ze lehen habnt von Sifriden vnd Rudolfen minen vettern von Zinczendorf vnd daz viertail an dem selben hof auch ze lehen hetten von hern Otten dem Travner, nv han ich mein viertail an dem hof daz von mir lehen was, der hof ze nachist leit vor der purch vnd vor dem house ze Randekk minem herren bischof Chu^onrat von Freysingen vnd sinem gotshouse ouf geben ledichlich vnd han mich des hofs gar vnd gaenczlich verczigen vnd swaz zv^o dem hof gehoert vnd von alter gehoert hat, besu^ocht vnd vnbesu^ocht, fuer mich vnd fuer alle min erben vnd han dar vmb enpfangen von minem vorgenanten herren bischof Chu^onrat von Frisingen vnd von sinem gotshouse sechs pfunt Wienner pfenning vnd pin der selben sechs pfunt gar vnd gaenczlich gewert. Vnd ze ainen verchuende han ich minem vorgenanten herren bischof Chu^onrat vnd sinem gotshouse disen brief geben versigelten mit minem insigel. Der ist gebn ze Waidhouen do von Christes gepuertt woren drivezehen hundert jar vnd dar nach in dem driv vnd drizzigisten jar an dem heilign Oster tag.

Source Fulltext: ZAHN, Codex Diplomaticus (=FRA II/35, Wien 1871) S. 200