Wir Chv^onrat von gots gnaden byschof ze Frising vergehen vnd tven chvnt allen den die disen brief ansehent oder hoernt lesen, ob daz waer daz her Raenprecht von Eberstorf, dem wir vnser vesten, vnser laeut vnd vnser gu^ot ze Enzenstorf enpholhen haben auf sein triwe, chainen schaden naem von vnsers gotshauz wegen vnd in vnsers gotshauzz dienst von Frising, er ald sein erben den wir, vnser gotzhauss vnd vnser nachchomen im pilleich ab legen sullen, dez selben schaden sol er vnd sein erben hintz vnser vnd vnser gotshauz vnd vnserr nachchomen ergetzung wartent sein, also daz wir oder vnser nachchomen vns zwen erber man nemen, vnd er oder sein erben in auch zwen erber man nemen vnd swaz die sprechent vber den selben schaden, des sullen wir ald vnser gotshauz ald vnser nachchomen im vnd seinen erben rechten dar nach in vier moneyten fuer daz der spruch getan wirt, vnd sol auch in vnd sein erben vnd sein diener des genuegen. Vnd daz im vnd seinen erben daz staet beleib von vns, von vnserm gotshauz vnd von vnsern nachchomen, darvmb geben wir im vnd seinen erben disen prief versigelten mit vnserm insigel. Der brief ist geben ze Wienn do man zalt von gotes geburte dreuczehen hvndert jar, dar nach in dem drey vnd dreizigistem jar, dez nachsten Vreytags vor sant Pauls tag als er bechert wart.

Source Fulltext: ZAHN, Codex Diplomaticus (=FRA II/35, Wien 1871) S. 199