Wir Chv^onrat von gots gnaden byschof ze Frising vergehen vnd tven chvnt allen den die disen brief an sehent oder hoernt lesen, daz wir haben genent vnd genomen hern Emchen von Altziae chorhern ze Frising vnd brobst ze Werdse vnd hern Otten von Liechtenstain chamerar in Staeir, dis (!) baid haben wir genomen vnd genent von vnsern wegen vnd von vnsers gotzhauzz wegen oder vnserr nachchomen ob wir enwaren, ob her Herdegen von Pettawe oder sein erben ob er enwaer, oder sein diener ze schaden chaemen oder enphiengen von vnsern wegen vnd von vnsers gotzhauzz wegen den schaden wir vnd vnser gotzhauzz im billeich solten ablegen, den suellen wir vnd vnser gotzhauzz oder vnser nachchomen ob wir enwaeren, gepunden sein ztven vntzvolfvern (!) nach der zwaier rat die wir dar veber genent haben von vns vnd vnsers gotzhauzz wegen, vnd auch nach der zwaier rat die her Herdegen von Pettawe dar veber genent vnd geben hat, die alle vier dar veber suellen sprechen bei ier trewen vnd bei ier eren, vnd swaz si sprechent bey ir trewen vnd bei ir eren daz wir vnd vnser gotshauzz oder vnser nachchomen ob wir enwaern, im suellen tven vmb die vodrvng vnd vmb den schaden ob er chaeinen schaden nimt oder enphaecht von vns vnd vnsers gotzhauzz wegen oder in vnsers gotzhauzz dienst, den schaden suellen wir vnd vnser gotshauzz oder vnser nachchomen ob wir enwaern, im oder seinen erben ob er enwaer, ablegen vnd widerchern alz die vier haissent bei ir trewen vnd bei ir eren, vnd suellen wir vnd vnser gotzhauzz oder vnser nachchomen ob wir enwaern, daz tven vnd volfueern im oder seinen erben ob er enwaer, nach der vier spruche dar nach in den naechsten vier monaiten. Waer au^och, daz vns vnd vnserm gotzhauzz oder vnsern nachchomen ob wir enwaern, oder hern Herdegen ainer oder zwen der vorgenanten schidlaeut abgiengen, so suellen wir vnd auch her Herdegen aeinen oder zwen an ir stat nemen, die allez daz volfvern daz vor geschriben stat. Der brief ist geben ze Waydhouen do man zalt von gots gepurt dreutzehen hvndert jar dar nach in dem drei vnd dreizgistem jar, dez naechsten Phintztag nach den Perchtentag.

Source Fulltext: ZAHN, Codex Diplomaticus (=FRA II/35, Wien 1871) S. 198-199